Mipilte sungpan a lina mipil

Laisiangtho in mipil thum (a hih kei leh) mipil bangzah in Aksi nungzui in Bethlehem ah koi ci bangin pai uh hiam cih hong gen lo hi.
Mitam ii theih tangthu khat in Caspar, Melchior leh Balthasar cih mipil thum om hi ci hi. Tua banah Artaban cih min a nei a lina mipil khat zong om lai hi ci-in tangthu khat in gen hi.
Artaban in Aksi pi nungzui in khualzin kipan aa, hong suak kumpi thak apiak ding letsong ahi, suang manpha thum zong pua hi.
Artaban in adang mipil te tawh lampi mun khat ah ki tuntuah dingin kiciam uh hi. Aman apai na lam kal ah cidamlo mi khat tawh kituak ahih manin tua mi a khoi dingin khawl hi. Tua bangin khawl leh alawmte tawh a kiciamna uh kipelh ding cih zong aman thei hi. Ahi zongin aman tua cidamlo mi huhin om hi.
Tu in Artaban in amah bek hi ta hi. Sehnelgam akantan na dingin nekleh dawn ding leh a vanpuak na ding kisam hi. Tua ahih manin Artaban in a nek adawn ding leh Kalaoch a lei na dingin ama suang manpha khat zuak hi. Tua suang manpha kumpi thakin ngah zo nawnlo ding cih ngaihsun in amah khasia mahmah hi.
Artaban paisuakin Bethlehem tung hi. Ahi zongin amah zekai mahmah ta hi. Herod kumpi ii thupiakna ahi kumnih nuaisiah pasalnote a thah ding galkapte mun khempeuh ah om hi. Tua ciangin Artaban in a suangmanpha khat tawh galkap bo pa maibiak in ama tun na mun a om naupangno te honkhia hi. Asuakta naupangno te ii nu te lungdam mahmah uh hi. Ahi zongin tua suang manpha kumpi thak kiang tung zo nawnlo hi.
Artaban ii kumpi thak a zongna hun pen kum (30) sung amawkna suak hi. Anunung ciangin singlamteh tungah mi a kithat ding ni khatin amah Jerusalem ah tung hi. Artaban in ama suang manpha sung pan amanpha pen tawh galkap bo pa maibiak in Jesu ki ci mi khat hon dingin Calvary mual tungah manlang takin kahto hi. Tua mipa in Arbatan ii nuntak sung tawntung a zonzon ahi kumte kumpipa hi ci-in ama kiangah mikhat in gen hi.
Tua hun laitakin sila kizuakna sumbuk ah a kikai numeino khat in Artaban samin huhna ngen hi. Artaban in zong ama ii anunung pen suang manpha tawh tua numeino nu a suahtak na dingin pia hi. Tu in Artaban khut sungah kumpi pa a piak ding letsong suang manpha khat zong om nawnlo hi.
Singlamteh phutna mun a tun ciangin amah in Jesu a huh nading bangmah hih zo nawnlo cih a theih ciangin amah khasia mahmah hi. Ahi zongin tua hun mah in alamdang mahmah thu khat hong piang hi. Jesu in Artaban ensukin gen hi.
“Artaban aw, lungkhamin khasia in om kei-in Artaban. Nang nuntakna sung tawntung ah kei na hong huh hi. Ka gilkial laitakin nek ding an nong pia hi. Tui duh daangtaak in ka om laitakin dawn ding tui nong pia hi. Silh ding puan ka neihloh laitakin ka silh ding puan nong pia hi. Khualmi in ka om laitakin zin nong do hi.”
Pawlkhat in gen uh hi. Artaban in Topa Jesu cik mah hunin mu zo lo hi. Pawl khat te in mipil te sungah amah a pil pen hi ci uh hi.