Mipil thum te pawi. Topa Jesu hong ki lahna pawini. (January – 7. 2024)

Epiphany cih kammal pen Greek pan hongpai hi a, “kilakna” cih khiatna nei hi. Mipil thumte pawi aki ci, Epiphany pawi pen thupi tak in bawlna hangin mipil thumte a lak, mihing khempeuh tungah Topa Jesu kilahna hong phawk sak hi.
Mipil thumte in naungek Jesu a bia dingin nisuah na lam pan Jerusalem ah hong pai uh hi. “Judah kumpi dinga hong suak naungek koi ah om ahi hiam? Nisuahna lam ah ama’ aksi hong kilang ka mu uh a, amah a bia dingin hong pai ka hi uh hi” (Mt 2:2) ci-in mipil thumte in Herode kumpi pa kiangah dong uh hi. Tua thu a zak ciangin Herod lunghimawh mahmah in Siampi te leh laisiangtho siamte sam a, “naungek Jesu koi mun ah suak ahi hiam? ci-in dong hi.
Tua mi te in zong “kamsang khat in hi bangin gelh hi. Judah gam sunga om nang Bethlehem aw, Judah gam a ukte lakah a neupen na hi kei hi; bang hang hiam cih leh na sung panin ka mi Israel mite a cing a kem dingin ukpa khat hong pai ding hi” (Mt 2:6) ci-in ki gelh hi. Tua ahih manin Judah gam, Bethlehem khua ah naungek Jesu suak ding hi ci-in dawng uh hi. Tua ciangin Herod in mipil thumte Bethlehem khua ah pai sak a, “Pai unla, tua naupang limtakin va zong un; amah na muh uh ciangin kei zong pai-in amah ka biak theih na dingin kei thu hong zasak un” (Mt 2:8) a ci hi.
Mipil thumte zong pai khia uh a, amuhsa uh aksi mah naungek omna tungsan ah a khawl matengin amaute makaihin amai-ah apai hi. Amaute in aksi a khawl a muh uh ciangin, a lungdam mahmah uh hi. Inn sungah a lut uh ciangin, naungek leh a nu Maria mu uh a, khukdinin a biak khit uh ciangin Kham, lawban leh myrrh cih van manphate apia uh hi. Herod kiangah a kihilkik lohna dingun a mang sung uh ah kihilh ahih manin lampi dang tawnin a gam uh ah a ciah uh hi.
Pawlpi ngeina ah tua mipil thumte min in Garspa, Melkow leh Beltasar hi ci-in ki mu thei hi. Amaute puak letsongte’ deihna te hi bang ahi hi. Kham in naungek Jesu in kumpi ahihna lak hi. Thungetna lim alak lawban in naungek Jesu ii Pasian ahih na lah na hi a, misi te sathau namtui aki nuhsak ciang aki zang ahi myrrh in naungek Jesu ii mihing ahihna leh mihing khempeuh in hotkhiatna angah nadingin sihna athuak nading lahna hi.