Khi thungetna ih ngetnop loh hangin bang hangin ngen teitei ih hi hiam cih thu

Khi thungetna ii thupitna

Bang hangin khi ih khin noploh hangin khin teitei ih hi hiam cih leh hi anuai a thu hang ahi hi. Innkuanin khi khin un. Innkuampihte aphun sesu uh hangin hanciamin khi khin un. Na khi khinna uh ii agah nangah ding hi.

“Nau te khi khin ni maw” ci-in mawtaw sung anungpen tutna ah atu Nupinu in a ta te kiangah gen hi. Bang hang hiam cih leh amaute paina gamla ahih manin minute (20) hal ta in hun tawh kituakin Khi khin khawm nading a ta te makaih den hi. Ahi zongin a ta te in khi khin nuamlo uh hi. Khi khin sangin amau ut dandan in langai, lai sim, ahih kei leh lamdung en in om nuam zaw uh hi. Kei mahmah zong kaneu lai-in tua bangin om nuam ka hih manin amaute ka telsiam hi.

“Ka tanu ka tapa te aw..thu nanget noploh na uh ka telsiam hi. Kei na Nu uh zong ka neu lai-in tua bang mah ka hi hi. Ka Nu leh Pa te in gamlapi khual ka zin uh ciangin khi khin dingin hong hanthawn den uh hi. Ahi zongin khat vei zong kei ka lunglut ngei kei hi. Khi khin ding cih nak leh a ihmu nuam kineihin ka om aa, ka khin nawn kei hi” ci-in lungduai takin a tate gen hi. Tua ciangin ka tate sung pan khat in “tua hi leh bang hangin thungen dingin ko hong hanthawn zel na hi hiam? Ko thu ka nget noploh pi uh” hong ci hi. Ama hong cih thu ka dawng na ding kiginsa in ka om hi. “Ka ta te aw..bang hangin thungen dingin hong hanthawn den ka hi hiam cih leh ken ka neu lai-in ka theihloh, thungetna ii manphatna, thunget ding aki sapna thu ka liat ciangin ka thei aa, ka tel hi. Tua mah bangin Khi khinna in bangzahin manpha in thupi hiam? bang zah in khi khin ding kisam hiam cih no zong na liat ciangun na tel ding uh hi” ci-in lungduai takin ka genpih hi.

Khi thungetna in amanpha mahmah letsong hi

Na nuntakna sung uh ah khat vei teitei na tuak ding uh hi. Tua ni-in no te mitmuhna ah leitung kisia ta hi ci-in na ngaihsun ding uh hi. Tua bang hun atun loh nadingin na dal nop uh hangin na dal zo kei ding uh hi. Tua hun ciangin no te ka hong huh nop hangin kong huh zo nawn kei ding a, tha zong kong pia zo kei ding hi. Ahi zongin khat limlim note geiah om ding hi. Tua mikhat in note a hong it mikhat ahi hi. Note hong it tua mi ii hong it na in kei kong it na sangin lian zaw hi. Tua mikhat in vantung ih Nu ahi Tonu Maria ahi hi. Ama huhna leh amah a bel mite aman cik mah hunin nial ngei lo hi. Khi thungetna in Tonu ii huhna akimu thei lim khat zong ahi hi.

Na nuntakna sung uh ah tua bang ni hong tun ciangin lau lua in thunget ding zong naphawk zo kei ding uh hi. Na lungsim sunguh ah khasiatna tawh na kap ding uh hi. Ahi zongin na genkhiat na ding uh kammal na mu zo kei ding uh hi. Na aw uh zong ging khia zo lo ding hi. Tua bangin koi ci thungen ding cih nangawn thei lo-in na om hun uh ciangin atawmpen khi thungetna thupha manpha aom na, na nuntakna sung uh ah khi nakhinna uh, Khi thungetna laibu et kul lo in nanget theihna uh hang ahi hi. Tua bangin na kam uh pan kammal khat zong napau zawh loh uh hun ciangin Lai Siangtho kammalte tawh aki gual Vantung thungetna, Ave Maria thungetna te na phawk ding uh hi. Tua ahih manin thu nanget nop loh hangun thunget ding hong hanthawn den ka hi hi. Na kisap mahmah hun uh ciangin na sunguh pan hong pusuak khiaziau thei ding cih ngimna tawh hong hanthawn ka hi hi.

Vantung gam ah paina lampi

Nuntakna sungah khimzing bangin gentheihna nathuak hun ciangin Khi thungetna in na lungsim hong nuamsak kammal te hong suak ding hi. Tua hun ciangin khi thungetna in vantunggam ah note pai nading lam hong honsak ahi hi. Na nuntakna sung uh ah huihpi, tuihual in hong nawkin namailam ah lah kalsuan zo lo, nunglam ah lah nungkik zo lo in na om hun uh ciangin na khut sung uh ah na Khi uh len cip un. Tua na Khi in hong hualcip nuam tuipi sungpan hong honkhia ding hi. Hih thupha lianpi note hong pia nuam ka hi hi. Nuntak khimzingna, huihpi tuihual te sungpan na suahtak na dingun, hi nuntakna hong dal galhiam note hong pia nuam ka hi hi ci-in Nupinu in a tate tel dingin gen hi.

Khi thungetna in leitung leh vantung hong kizomsak lampi hi. Hih kizopna amaute in anuntakna sungah lencip ding uh hi ci-in ka um hi. Ka naupangte lungduai takin hi thu ka gen ciangin khi khin nuamlo cih aw dai pah hi. Khi khin khit ciangin amaute deih la te sa in, lai te sim thei ci-in zong ka ciam hi. “Tu a khi khin ding hong tangsawl na Nu uh tungah nikhat ni ciangin na lungdam mah mah ding uh hi” ci-in zong ka gen hi. “Nang tua te koi ci thei khol na hiam Nu aw” ci-in ka ta te sung pan khat in hong dong hi. Ken zong “bang hang hiam cih leh na Pu leh na Pi uh ahi, ka Nu leh Pa te in tua bangin hong hih sakna ka thuak khak thu te om ahih manin hong ci thei hi ing. Tua lai-in khi khin nuamlo pi-in ka khin kha hi. Tu in ahih leh amaute tungah nisim in lungdam ka ko ko hi. No zong tua bang mahin pello in na hi ding uh hi ka ci ngam hi” ci-in ka gen hi. Tua ahih manin nisim ka nuntakna sungah khat veivei nasep tamin ka gim ka tawl luat na hangin khi ka khin nop kei phial leh zong hanciamin ka man dong ka khin kankan hi.

 

Add new comment

1 + 18 =