Catholic thuzuite’ theih huai thu te

Pawlpi sunga a kizang lim, van leh puan te ii deihna.

Tembaw

Tembaw pen Catholic pawlpi ii lim in kizang hi.

Kumpi khatin leitung mong khatah gam thak khat phuan hi ci-in na mit kha in bawl in. Tua gam ah mite tua gam mi asuah nading un kumpipa in sam hi. Tua khit ciangin Tembaw bawlin khual gamlapi zin dingin ama teel mite ki gingsak hi. Mite in Kumpipa sapna zui uh ahih manin a sawt lo-in tembaw sungah mi dim hi. Gam thak a phuat nading a kisam van tuam tuam te zong tembaw sungah koih hi.

Hih gam thak a phuan pa in Pasian ahi hi.

Gam thak pen vantung gam hi a, nang leh kei in tua gam thak ah pai ding in teelna a ngah te ih hi hi. Ama bawl\lam Tembaw in Catholic pawlpi ahi hi. (Mt 16:18) Tembaw a pai thei sak vangliatna pen Kha Siangtho ahi hi. (Act 2: 4) Vantung gam tun nading, ei te ading a kisam khempeuh tembaw tungah ih mu ding hi. Tua te in-

Tuisawpna Sacramentu (Mt 28: 19, Jn 3:5),

Christma hanthotna Sacramentu (Jn 6:51, Lk 22: 19-20),

Siangtho Pumpi Sacramentu (Mt 10:20, Mk 13:11),

Mawhsutna Sacramentu (Jn 20:22-23),

Cina te sathau siangtho nuh na Sacramentu (Mk 6: 13, James 5: 14-15),

Siampi suahna Sacramentu (Lk 22: 19-20) leh

ki teenna Sacramentu (Mt 19:6, Mk 10:11-12) te ahi hi.

Hih ciaptehna te in Topa Jesu hun lai a, Huihpi leh tui hual te adaihsak hun pan hong piang ahi hi.

Akkeng lim Tawhtang

Tawhtang cih pen za neihna lahna hi. Tua in a lianbel Siampipa ii “za neihna, aana” a lak lim hi.

Laisiangtho sungah vantunggam ii tawhtang ci-in siangtak teltakin hong lak hi. Mt 16: 19 sungah “Vantung gam kong honna tawhtangte nang kong pia ding hi. Leitunga na hen khempeuh, vantung ah kihen dinga, leitunga na phel khempeuh, vantung ah zong kiphel ding hi,” ci hi.

Misiangtho Petru in amasa pen Pope hi a, ama za a laih Pope te in Topa Jesus ii piak za/aana sungah ki hel hi. Tua hun pankipan tawhtang te in papacy ii limlahna hong suak hi. Tua tawhtang nih te in Vatican khuapi ii dial leh Vantican ii limlahna sungah ki hel hi.

Pasian mittang

Pau 15:3

Pasian mit tang in mun khempeuh ah om in vantung leitung khempeuh a cing a kem a vanglian pen hihna tawh vantung gam alak lim ahi hi.

Ei te ii ih sep ih bawl khempeuh hoih taleh hoih takeileh Pasian in hong en gige hi cih hong thei sak hi.

Sik kual bangin a kual lim in Pasian pen a tungtawng ahih na lim lahna hi.

Pasian in ki patna leh tawpna nei lo-in, hun ii apualam ah om hi cih hih a kual limin hong lak hi.

Siik kilthum lim in To thum Pasian khat lim lahna hi. Tua lim kiim aom meei leh vangtang te in Pasian leh kha thu tawh kisai vangtangna lim hong lak hi.

Ps 34: 15 sungah “TOPA’ mit in midikte’ lamah om a, a bil in zong amaute’ kikona aw a ngai hi” ci hi. Pau 15: 3 sungah “TOPA’ mit in mun khempeuh mu a, mi sia le mi pha a encik kim hi” ci hi.

Tuu no lim

Topa Jesu pen tuuno khat bangin hong lahna hi. Tua thu pen Laisiangtho sungah a bulpi om hi. Jn 1: 29 sungah “John in ama kiangah Jesu hong pai a muh ciangin, “Leitung’ mawhna a lakhia Pasian’ Tuuno! En un!” na ci hi. Hih pen tui phumpa John in Topa Jesu pen “Tuuno” ci-in a sapna ahi hi. Laisiangtho sungah Topa Jesu pen Tuuno tawh gentehna ii akipatna hi.

Tua thu in Laisiangtho lui leh Laisiangtho thak te ii kizopna kipsak kik hi.

Laisiangtho lui EX 12: 23 sungah Faro kumpi a langpan uh a nunung pen daan thuakna in Israel mite saal hihna pan a suahtak na ding un, Israel mi ulian te khempeuh Moses in samin “note in na innkuan ciat uh ah tuu no go in paisan pawi na bawl ding uh hi,” ci hi.

EX 12: 13-29 sungah “Tua tuu no si san, baang tungah zut un. Tua tuuno si san a ki zut lo inn khempeuh pen tua ni zan mahin a tacil te uh ki that ding hi, Pasian in ci hi,” ci hi.

Hih in Laisiangtho ii lamlak lim ahi hi. Tua in leitung mawhna te alakhia tuuno ii lim lahna hi.  Bang hangin tuu no in Topa Jesu tawh genteh dingin ki lawm/tuak ahi hiam? Bang hang hiam cih leh paubaanna le meelhemna a om lo tuuno ahi Christu’ sisan manpha tawh note hong tankhia ahi hi. (1 Peter 1: 19)

Tuuno in Christu adingin a hoih mahmah gentehna khat ahi hi. Singlamteh tunga biakpiakna in biakpiak na khempeuh ii a thupi penpen biakna hi a, hi thu hangin “Christu pen Tuu no” tawh a ki genteh ahi hi.

Tua ahih manin Tui phumpa John in “Pasian tuuno” ci-in sam hi. (Jn 1: 29) (Heb 9: 12.14)

Rome 3:23 sungah “Amaute in Jesu Christu hanga kingah tatkhiatna tungtawnin, ama hehpihna a khawnkhong a ngahna hangin diktansakna a ngah uh hi.”

Tuu no lim in amasa pen paisan pawi in Egypt gam saal tanna pan Hebrew mi te suahtakna lim lahna ahih ban ah Topa Jesu ii sih thukhenna thuakna in eite mawhna sila ih hihna pan hong suahtaksakna lim lahna ahi hi.