Catholic Pawlpi Thu

Catholic pawlpi' ciaptehna nam (4) te in----
1. Khat bek ahi pawlpi (One)
2. Siangtho na (Holy)
3. Leitung but tawh ki sai (Catholic or Universal)
4. Nungzuipi te pan hong ki zom (Apostolic)

Pasian tanu tapa hih na in alian pen Pasian hongpiak thupha hi.
Na pawlpi it-in, midang te pawlpi thu kan in la zahtak in.
Pasian in na biak Pasian leh na pawlpi tunga, na cihtak na hangin thupha hong pia ta hen.

Tuni Catholic cih thulu tawh kisai theihhuai thu tawm kong hawmkhia nuam hi. Catholic pawlpi pen Topa Jesu mahmah in aphuat pawlpi ahi hi. Catholic cih kammal pen Greek kam (katholikos) pan hong piang hia, leitung bup tawh kisai cih khiatna nei hi. Catholic cih kammal pen AD 35 pan 107 hun sung anungta ahi St.Ignatius in na zang ma-sa pen hi. Bang hang hiam cih leh Catholic cih pen adang upna khial azui te tawh a kigawm sak nop loh man ahi hi. Catholic pawlpi bek in Topa Jesu hunlai pek pan aom pawlpi ahi hi . A dang Christian te ahih leh Catholic pan in apai khia ahiang te ahi uh hi. Estern Orthodox pawlpi pen 1054 AD hunin alianbel siampi pa khut sungpan na pai khia uh hi. 1517 AD huna akipan (reformition ) puahthak hunin adang Protestan tuamtuamte hong piang uh hi. Tua ahihman in Catholic pawlpi-in Jesu Topa pan hong piang pawlpi aki ci ahi hi. Tua banah Catholic ih cih phetin ih mitkha ah aki mu theipah ahi ciaptehna nam 4 te zong kong hawm nuam hi. Tua te in- One, Holy, Catholic, Apostolic cih te ahi hi. 1 cor 10:17/12:13
One Pumkhat cih na thu ama-sa penin kong hawm nuam hi. (Rome 12:5) Topa Jesu in Catholic pawlpi pen AD 33 kum in Jerusalem ah na phuankhia hi, tua hia, Catholic ih cih ciangin adangdang pawlpi te tawh kigawmna om lo hi. Tua ban ah pawlpi pen Topa Jesu ii zi hi ci-in Laisiangtho sungah ki gelh hi. (Eph 5: 23/32) te ah ki mu thei hi. Topa Jesu in zi khat bek nei hi. Tua azi-in Catholic pawlpi ahi hi. Tua ahihmanin Catholic pawlpi in hong hilh thu te pen nungzui pi ten ana gen uh/ a hilh uh thu te tawh aki bang ahi hi. Tua ban ah Catholic pawlpi in hong hilh thu te pen Laisiangtho sunga om thu te tawh ki tuak hi cih te zong ih theih ding ki sam hi. Tua ahih manin Catholic pawlpi in aki bang pawlpi khat ii hilhna, zuih ding thu khun, Sacramentu, Nungzuipi te mun ala alianbel siampi pa leh Siadaw te, siampi te ii hong makaih na nuaiah upna khat, tuisawpna khat tawh ki pumpikhat in om hi. Tua bek tham lo Topa Jesu mahmah in pawlpi aphuah lai-in ki pumkhat na dingin thu nangetsak hi. Tua ahih manin Catholic pawlpi-in tu ni dongin ki tam kham lo in kipumkhat in om hi.

Holy (Siangtho hi) Eph5:25/27, Rev 19:7/8
Bang hangin Catholic pawlpi in singtho hi ci-ih hiam cih leh Topa Jesu in Khasiangtho Pasian sawlin Catholic pawlpi aphuatkhait hang ahi hi. Tua ahih manin Catholic pawlpi suah ni pen Topa Jesu sihna pan hong thawhkik zawh ni (40) leh nungzuipi te tawh aom khop khiat ciang Vantung ah akahtoh khit ni (10) tawh kigawm ni (50) a cin-ni, Khasiangtho Pasian hong kumsuk ni pen Catholic pawlpi suahni ahi hi. Topa Jesu in amah mah asiangtho mah bangin ama thupha hangin pawlpi zong siangtho sak ahih manin Catholic pawlpi pen singtho na’ phungpi ahi hi. A hi zongin Catholic pawlpi singtho cih the pawlpi sungaom thuzui khempeuh siangtho hi cih na hi pah lo hi. Pawlpi sungah mi hoih leh hoih lo aom na thu Topa Jesu mahmahin Jn 6:70 sungah honggen hi. Catholic thuzui hih manin vantung gam ngahpah ding zong hi pah lo hi. Ahi zongin Topa Jesu in Sacramentu hong bawlsak na tawh Catholic thu zui ten asingtho nuntakna angah na dingun thupha hehpihna hong pia hi. Act 2: 1-4

Catholic or Universal Mt 24: 14/ Mk 16: 15
Mi khempeuh tawh kisai
Catholic thuzui khat na hih leh nangpen mikhempeuh tawh a ki-sai na hi hi. Tua ahih manin Catholic thuzui khat in koi mun koi mun ah aom zongin mikhempeuh tawh kisai ahih na phawkden ding ki sam aa, ciapteh huai hi. Topa Jesu in anungzuipi te (Mt 18: 19, 20) na ah leitung munkhempeuh ah pai-in lungdamna thu atangko nadinguh asawl hi. Tua ahih manin Catholic pawlpi in kum (2000) val dongin lungdamna thu tangko tawntung hi. Topa Jesu in leitung mi khempeuh’ mawh na hangin sihna athuak ahi hi. Tua ban ah Topa Jesu in mikhempeuh ama innkuanpih asuaksak nopna thu Catholic pawlpi in tuni dongin tangko uh hi. Tua ahih manin tulaitak leitung mun tuamtuam, gam tuamtuam te ah Catholic thuzui te na mu ding hi. Tua bek tham lo in Catholic pawlpi in gamtuamtuam aom minamkim te Catholic thuzui te hong suah nading, Pasian nasem te sawlin lungdamna thu tangko in om uh hi. Bang hang hiam cih leh Catholic pawlpi in mihing te lamlak ding, makaih ding cih vaipuak lianpi anei te hi cih phawkin tua vaipuak asem uh ahi hi. Tua ahih manin Sanggam aw, “kei-in Catholic thuzui ka hi ”na cih leh mikhempeuh tawh na kisai na thu naphawk tawntung ding kisam hi cih kong theisak nuam hi.

Apostolic Nungzuipi te pan hong ki zom
Topa Jesu mahmahin aphuat pawlpi-in nungzuipi te pan hong kizom pawlpi ahi hi. Catholic pawlpi' ama-sa pen alianbel siampi pa ahi St. Petru panin hong ki zomsuk in, tu laitak aa alianbel siampi ahi PaPa Francis dong, siampi lian 266 om ta hi. Bang hang hiam cih leh Topa Jesu in nungzuipi te Pawlpi amakaih dingin thu apiak na hang hi. Tua ahih manin nungzuipi te pen Pawlpi ii ama sa pen siadaw te ahi uh hi. Tua manin Catholic pawlpi in nungzuipi te pan hong ki zomsuk ahih mah bangin tu ni dongin Laisiangtho leh pawlpi tangthu te tungtawnin akalsuan, athuman pawlpi ahih na thu 2 Tim 2:2 na sungah ki mu thei hi. Tua ban ah Topa deihna tawh ki zui-in nungzuipi te' zalaih ahi Pope te leh siadaw te in pawlpi uk in , amakaih ahih mah bangin mailam ah zong atawntungin uk in makaih den ding uh hi. Hi bangin Catholic pawlpi sungah Topa Jesu pan hong ki pan hih na aana aom mah bangin Mt 18:19 sungah ih mu thei ding hi.

Tu a kong hawpkhiat thu in Catholic cih in, cih thu tawh kisai in ciaptehna nam 4 te hong hawmkhia ka hihi. Hi bang ciapteh na pen Catholic pawlpi khat bek ah om in adang pawlpi te ah om lo hi. Tua ahih manin Catholic pawlpi-in Topa Jesu phutsa pawlpi hi cih thuzui te in ih phawk tawntug ding kisam hi. Pawlpi-in tu ni dongin Ki pumkhatna, Siangthona, Catholic(or) Leitung vannuai tawh ki zopona leh Nungzuipi te pan hong ki zom suak pawlpi in ih kalsuan zawhna in mihing te sepzawhna bek hi lo in, Pa pasianin ama pawlpi thupha piain amakaihna hang ahi hi. Pasianin Isarel minam te Igyp te khut sungpan ahotkhiat dingin sun leh zanin meeilum tawh na ompihin lam nalak hi. Tua thu Pai 13:23 sungah ki sim thei hi. Tuni in zong Pasian in Catholic cih meikhuampi tawh ei te lam hong lak lai hi.Catholic pawlpi in Topa Jesu piak aana tawh thuzui te lamlak in tonpih den hi. Tua ahih manin thuzui te in bangmah lungkhamna, up lahna te om lo in ih pawlpi sungah upna kip tawh ih kalsuan ding ki sam hi. Catholic pawlpi sungah thuzui mi khat in ih om khak na in Pasian hongpiak thupha lianpi khat ahi hi. Tua ahih manin ih upna khahsuah lo-in, mi dang te zong ih upna tawh lam alak zo thuzui te ih suah zawh na dingin hanciam ciat ni ci-in kong hanthawn nuam hi. Na vakpi tungah Pasian in aki cing thupha hong pia ta hen ci-in thu kong ngetsak hi. Na vekpi tung uh ah lungdam hi.