St Mark the Evangelist (Evangelium secundum Marcum)

Mi Siangtho Mark tangthu en dih ni; Amah pen kum AD-5 pawlin Cyrene a ki-cihna mun Pentapolis of North Africa ah na piang hi. Mi Siangtho Barnabas ii innlak sanggam pa hi-in, Rome ah Pope masa pen ahi Mi Siangtho Peter ii nungzui in na pai hi. Mark Lungdamna lai siangtho pen misiangtho Mark mah in a gelh ahi hi. Ama min John Mark zong kici hi. John Mark a khiatna in ‘Gawmtuahpa’ ahih kei leh, ‘Kipawl khawmsakpa’ a cihna ahi hi. A nu’ min Mary hi a, a nu pen Jerusalem khua a nupi hoih khat hi-in, inn golpi nei-a nasem zong a nei hi. Herod Agripa I in Peter thong a khiat sungin a inn ah thuzui masate a kikhawm uh hi (Nzp. 12:12). 

Mark in Alexandria ah Pawlpi na phut hi, ci-in Pawlpi’ tangthu sungah kigelh hi. A siangtho tanglai mite’ teci panna kici laibu sung mun khatah misiangtho Mark pen misiangtho Peter’ kamphenpa hi, ci hi. Lungdamna lai siangtho lite’ lakah Mark’ gelh lai siangtho in a tom pen, a kician pen le a kicing pen ahi hi. Amah in Topa Jesu’ gimmthuakna adangte sangin lim gen zaw hi. Topa Jesu’ sihna pan hong thawhkik zawh a kumkik ciangin misiangtho Peter in tuisawpna pia-in Christian hong suak ahi hi (1 Pet. 5:13).

Mark’ gelh Lungdamna lai siangtho pen A.D. 64 ma A.D. 50 pawlin, Rome khuapi ah Gentile mi Pasian’ thuzui mite’ aadingin Greek kam tawh a gelh ahi hi. Amah in Jesu’ nung a zuih ngei loh hangin Peter’ gen thu teng a gelh ahi hi. Ama gen nop bulpi in, Jesu pen Honpa (Messiah) le Pasian ahihna a gen nuam ahi hi. Tua ahih manin Mark in Jesu’ na lamdang bawlte le a na sepnate a gelh hi.

Amah pen April 25,68 kum in
Cyrene, Libya, Pentapolis (North Africa), aki cihna mun, tu-in Shahhat, Jabal al Akhdar, Libya gam ah bishop a sep hun sungin biakna hangin sihna a thuak hi. Kum simin April kha 25 ni-in misiangtho Mark’ pawi kibawl den hi.

Mi Siangtho Mark aw, Kote aading in thu hong ngetsak ta'n.

#RVA, #KalayDiocese, #StMark, #DailySaint, #Feastday,