Homily by Cate. Joseph Hau Kap (7.2.2020)

Catholic Nisim lai Siangtho, Hun Nautaang Nipi Kaal (4) Na, (FRI). February 7, 2020. Lungdamna Lai Siangtho.Mark 6: 14-29. 14. Jesu’ min kithei thang khin ta ahih manin Kumpipa Herod in zong hih thu a za hi. Mi pawlkhat in, “Tuisawppa John a sisa tho kik hi a, tua hangin amah in na lamdang bawl theihna vangliatna a nei ahi hi,” a ci uh hi. 15. Ahi zongin mi kimkhat in, “Hih mipa in Elijah ahi hi,” a ci uh hi. Midangte in, “Tanglai kamsangte mah bangin kamsang khat ahi hi,” a ci uh hi. 16. Ahi zongin Herod in hih thu a zak ciangin, “A ngawng ka tansak John, sihna pan hong thokik zo hi,” a ci hi. 17. Bang hang hiam cih leh Herod in a naupa Philip’ zi Herodias a suhna thu hangin John man a, thong sungah a khum hi. 18. Bang hang hiam cih leh John in Herod kiangah, “Na naupa’ zi sut-a na teenpih pen thukham tawh kituak lo hi,” a ci hi. 19. Tua ciangin Herodias in John mudahin a that nuam hi. Ahi zongin tua nu in amah that thei lo hi, 20. bang hang hiam cih leh John pen midik khat le a siangtho mi khat ahih lam Herod in thei ahih manin amah kihta-in a kem hi. Amah in John’ thu a zak ciangin lungkham napi-in ama thugen a ngai nuam hi. 21. Ahi zongin hun hoih khat hong tung a, Herod’ suah ni-in a upate, galkap mangte, le Galilee gam uliante an a vak hi. 22. Tua laitakin Herodias’ tanu sungtumin lama, Herod a kipan amah tawh an a ne khawmte a lungkimsak hi. Herod in, “Na deih peuhpeuh hong ngen in, kong pia ding hi,” ci-in numeino thu a pia hi. 23. Tua ciangin amah in, “Nong nget peuhpeuh, ka kumpi gam phel khat nangawn kong pia ding hi,” ci-in a kiciam hi. 24. Tua numeino paikhia a, a nu kiangah, “Bang ngen ding ka hi hiam?” ci-in a dot ciangin, a nu in, “Tuisawppa John’ lutang ngen in,” a ci hi. 25. Kumpipa’ kiangah numeino a manlangin paipah a, “Tuisawppa John’ lutang kuangdai-in hong pia lecin ka ut hi,” ci-in a ngen hi. 26. Kumpipa dah mahmah a, ahi zongin ama kamciamnasa le a nitak an nekpih a lenglate a zahtak manin numeino’ ngetna a nial ngam kei hi. 27. Thakhatthu-in kumpipa in a cing galkap khat sawl a, John’ lutang hong paipihna ding thu a pia hi. Tua pa pai-in thong sungah John’ ngawng va tan a, 28. kuangdai sungah a lutang hong paipihin, tua numeino a pia hi. Tua ciangin numeino in a nu a pia hi. 29. John’ nungzuite in hih thu a zak uh ciangin pai uh a, a luang la-in han sung khatah a vui uh hi.

Hih in Topa' lungdamna Lai Siangtho ahi hi.