Catholic Nisim Lungdamna Laisiangtho. Hun Nautaang Nipi Kaal (25) na. 22.9.2024 (Sun)

Mark 9:30-37
30. Tua mun panin amaute paikhia uh a, Galilee gam a kantan uh hi. Jesu in amau omna kuama theih ding deih lo hi.

31. Bang hang hiam cih leh, “Mite’ khut sungah Mihing’ Tapa kilehhekin kipia ding hi. Amaute in amah that ding uh a, ni thum khit ciangin amah a thokik ding hi,” ci-in a nungzuite a hilh hi.

32. Ahi zongin a nungzuite in a cihnopna a theihtel loh uh hangin a dong kik ngam kei uh hi.

33. Tua khit ciangin amaute Capernaum khua tung uh a, inn sungah a om laitakun, “Lampi ah bang thu kinial na hi uh hiam?” ci-in Jesu in a nungzuite a dong hi.

34. Ahi zongin amaute pau loin a om uh hi. Bang hang hiam cih leh, eite’ lakah kua lian pen ihi hiam, ci-in lampi ah khat le khat a kisel uh hi.

35. Jesu tusuk a, sawm le nihte a sap khit ciangin, “Mi khatpeuh a masa pen a suah nop leh a nunung pen le, mi khempeuh’ nasem ahi ding hi,” a ci hi.

36. Tua ciangin amah in naupangno khat sam a, amaute’ laizang ah a koih hi; A angah tawi-in, Jesu in amaute’ kiangah,

37. “Keima min tawh hih bang naupangno khat a sang peuhmah in kei hong sang ahi hi. Kei hong sang peuhmah in kei hi loin kei hong sawlpa a sang ahi hi,” a ci hi.

Hi in Topa' Lungdamna Laisiangtho ahi hi.