Misiangtho John Eudes Pawini. (Aug- 19)

Misiangtho John Eudes in Piantit gam, Normandy ah suak hi. Kum 14 aphak ciangin siangthona tawh nuntak nadingin kiciamna nei in Jesuit te kiangah pilna sin hi. 1623 kumin A nulehpa te phal loh pi-in John Eudes in Paris a om Congregation of the Oratory cih ki pawlna ahi, thu gen ki pawlna khat ah lut hi.

Ama hanciamna hangin Siampi a suahma tangval siangtho hun pan thu gen khuan ngah hi. Siampi a suah khit ciangin Pasian nasepna kum tampi sem aa, amau hun lai aa Pasian nasem minthang te sung ah khat ahi hi.

John Eudes in “Pasian thu gen te in sawlbuk sat hi. Ahi zongin Pasian thu teci apangte in vasa te man hi” ci-in gen den hi. John Eudes in ama mission nasep hun sungin Siampite in amau tuu no te sangin ki puahphat ding kisam zaw hi cih mu khia hi.

Tua ahih manin 1643 kumin thugen ki pawlna pan pusuakin Congregation of Jesus and Mary cih kipawlna phuan hi. Ama kipawlna sunga om te in Siampi sin sang naupangte leh amau Diocese sunga om Siampite a huh dingin amau leh amau kipiakhia uh hi. Tua kipawlna in Siampite siangtho nading leh mite adingin mission sem ding cih ngimna nei hi. Siampi sinna sangah Pasian in mihingte tungah bangzahin hehpihna nei cih hilh cian aa, tua thu hangin amah hong minthang hi.

A kisikkik numeite adingin Sisters of Our Lady of Charity of the Refuge cih kipawlna khat zong phuan hi. Tua hun sungin misiangtho John pen thugenna leh mawhsut ngaihna te tawmvei ki khawl sak hi. Tua ahih manin aman tua hun sungin lai gelhin laibu bawl hi. Adiakdiak in Topa Jesu lungtang siangtho leh mawh cilna nei lo Tonu lungtang siangtho zahtakna thu te gelh hi.

John Eudes in Topa Jesu Siangtho Lungtang leh Tonu Maria Siangtho Lungtangte zahtak mahmah hi. 1670 kumin John Eudes in “Biak ding akilawm Topa Siangtho Lungtang zahtakna” cih thulu tawh laibu khat gelh hi. Tua laibu sungah Missa biakpiakna leh Divine office te kihel hi.

John Eudes ii aminthang pen pen kammal in “A siangtho Missa biakpiakna bawlna ah ki ginkholhna, tua Missa biakpiakna bawlna leh tua Missa biakpiakna adingin lungdamkohna cih nam thum ki sam hi” cih kammal ahi hi. John Eudes in 1680 kum, August 19 ni ama kum 78 aphak in si hi. Amah pen Mission nasemte ahuh Misiangtho khat in kiciamteh hi.

Misiangtho John Eudes aw…ko te adingin thu hong ngetsak tan.