Catholic Nisim Lungdamna Laisiangtho. Hun Nautaang Nipi Kaal (19) na. 11.8.2024 (Sun)

John 6:41-51
41. Tua ciangin Jesu in, “Keimah in vantung pana hong kumsuk khomun ka hi hi,” a cihna hangin Jew mite in amah a phunsan uh hi.

42. Amaute in, “Hih in Joseph’ tapa hilo ahi hiam? A nu le a pa eite in thei hilo ihi hiam? Tua ahih leh amah in, ‘Keimah in vantung panin hong kumsuk ka hi hi,’ bang hangin ci thei ahi hiam?” a ci uh hi.

43. Jesu in amaute’ kiangah, “Note sungah khat leh khat kiphunsan kei un.

44. Kei hong sawl Pa in a sap mi longal ka kiangah kuamah hong pai thei lo hi. Keimah in ni tawp ni ciangin tua mi ka thosakkik ding hi.

45. Kamsangte’ laibu sungah, ‘Amaute khempeuh Pasian in a hilh ding hi,’ ci-in kigelh hi. Pa’ thu ngai a, ama kianga a sinte khempeuh ka kiangah hong pai ding hi.

46. Pasian’ kiang pana hong paipa longal, kuamah in Pa mu ngei lo hi. Amah bek in Pa a mu hi.

47. Ken a man takpi kong genin ah, kei hong um mi khempeuh in nuntak tawntungna a nei hi.

48. Keimah in nuntakna khomun ka hi hi.

49. Na pu na pate un sehnel gamlak ah manna ne uh a, a si uh hi.

50. Hih khomun in vantung pana hong kumsuk khomun ahi hi. Hih khomun a ne mi si ngeilo ding hi.

51. Keimah in vantung pana hong kumsuk a nungta khomun ka hi hi. Hih khomun a ne mi a tawntungin a nungta ding hi. Hih khomun in leitung mite’ nuntakna dinga ka piak ding ka sa ahi hi,” a ci hi.

Hi in Topa' Lungdamna Laisiangtho ahi hi.