Misiangtho Afra Pawini. (August – 5)

Misiangtho Afra pen numei paktat khat hi-in Pasian thu a theih pan kipan ama nuntakna kikhel in Pasian tanu misiangtho a suak khat ahi hi.

Afra in Germany gam ah suak hi. Anu leh a nasem te uh mi (3) tawh Germany gam, Augsburg khua ah Hotel dan khat lamin tua lai ah numei paktatte om nading vaihawm uh hi. Tua hun pen Roma emperor Diocletian hun hi a, Christian te a bawlsiat mah mah hun ahi hi.

Khat vei, Siadaw Narcissus pen galkap te in that dingin zong uh ahih manin amah a Afra te hotel ah a ki bu dingin va tung hi. Ahi zongin tua hotel bang dan him cih Siadawpa in thei lo hi. Afra tawh a ki muh ciangin siadawpa in Pasian thu gen pih ahih manin tua pan Afra in Pasian hong thei in Pasian thu hong um hi. Tua pan Afra te nuta in tuisawpna sang uh hi.

Tuisawpna a san khit pankipan Afra in ama mawhna te adingin thungetna, mizawngte huhna leh a ki sam mite man piak kul lo-in huhin panpih a, ki sikkikna tawh nungta hi.

Ahi zongin a sawt lo-in Diocletian in Afra Christian ahih lam thei ahih manin dawi biakna in Afra nuntakna a ki piak sak nadingin thu pia hi. Ahi zongin Afra in nial ahih manin kumpipa heh mahmah a, Giaus thu sit sak hi. Siadawpa thu zong Afra kiangah a dot uh hangin Afra in gen nuam lo hi.

Thusit pa in simmawh bawlsiatna thuakin na sih sangin dawi bia inla nungta leteh hoih zaw ding hi acih hangin Afra in Pasian ka theih ma a kabawl mawhna te ki cing khin hi. Cikmah hunin hi bang mawhna te ka bawl nawn kei dinga, Pasian zong ka simmawh nawn kei ding hi ci-in gen hi.

Ahi zongin thusitpa in hi zahtak a a nin numei nahih lam ki thei inla, dawi biakna in ki zang le tawh hoih zaw hi a cih kik kik leh Afra in “Pasian in vantung pan hong kumsukna pen mawh nei mite a honkhia ding hi ci-in gen a, Laisiangtho sungah zong mawhnei numei khat in Topa khe amittui tawh sil sakin ama mawhna khempeuh ki mai sak hi” ci-in tua thusitpa Laisiangtho tawh a gen kik ciangin thusitpa hehna khang sem sem hi.

Tua ciangin thusitpa in “Pasian in nang amah tawh ki lawm lo hi ci-in hong mu ding a, nang numei paktat khat na hih manin Christian in hong sam lo ding hi” a cih leh Afra in “hi mah hi, kei Pasian tawh ki lawm kei mah ing. Ahi zongin Pasian ii hoihna phatna a ngah kei mah in ama min siangtho sungah ka kilawm hi” ci-in dawng kik hi.

Thusitpa in Afra mawhna daan a tawm theih theih na dingin zol bawlin a genpih hangin Afra in “kei ii lungkhamna, khasiatna te in ka mawhna te hang ahih manin hih ka mawhna te pan hong honkhia Pasian pen cik mah hun in ka taisan zo kei ding hi” ci-in hangsan takin dawng hi.

Thusitpa in nang tawh thu ka kinial ka maizum, tun ka cih bang nong man kei leh na si ding hi a cih kik leh sih ding a kihta lo Afra in sih daan piakna tel in sih na daan thuakin tuikulh mun khat ah apuante suahkhiatsak in singkhuam tungah a khut te pan khau tawh henin a hing pi-in meihal na thuak hi.

Tua bangin meihalna athuak laitakin Afra in vantung lam ento in “Aw..Topa, mawhnei mite a honkhia ding in hong pai Pasian aw, hih leitung mei panin kei hong honkhia in. Ka pumpi leh ka kha hong kisia sak dingin hong bawl sia tawntung mei pan kei hong hon in. Pa, Tapa, Kha Siangtho tungah minthan vangliatna om ta hen” a cih khit ciangin si hi. Tua ciangin a nu leh a nasem te in Afra luang la in vui uh hi. A nasem thum te in zong tua ni mahin tuisawpna sangin Christian suak uh hi.

Misiangtho Afra aw…kote adingin thu hong ngetsak in.