Misiangtho Alexius Pawini. (July – 17)

Misiangtho Alexius pen mihau innkuan sung pan Kumzalom (5) hunin Rome ah suak hi. Alexius in mihau kumpi nasem khat ii tapa ahi hi. Ahi zongin a nu leh pa te in amau sung pan apiang a tapa uh thei tel lo-in khut dawh ngen khat in ngaihsun in sila bangin bawl uh hi.

Alexius in a neih a lamh te a nusia nuam khat ahih hangin a nu leh pa te in mihau nungak khat tawh a ki teengsak uh ciangin a nu leh pa thu nial zo lo ahih manin tua nungaknu tawh ki teeng uh hi. Ahi zongin Pasian thupha tawh a ki letthat ni zan mahin tua nungak nu tawh anih thukim in Alexius in mo nu nusia in tai sim hi.

Mi cimawh te a huh zel zel Alexius in Edessa khua dong tai sim in tua khua a om mizawng te, khutdawh ngen te a muh ciangin amaute’ nuntak bangin om dingin khentat a, kum (17) sung tawntung lam dungah khutdawh ngen in om hi. A nu leh pa in ta khat bek a neih uh ahih manin it mahmah uh a, a nasem te uh a tapa zong dingin nisim in paisak uh hi.

Ahi zongin nikhat, Alexius inn pan nasem te khatin khutdawh ngen a om Alexius kiangah sum a khiat hi. Ahih hangin Alexius ahih lam tua nasem pa in tel lo hi. Alexius in tua sum khia a nasem te kiangah Pasian ii ciitna hangin Pasian tungah a lungdamna thu gengen hi.

Khutdaw ngen te sungah Alexius minthang mah mah hi. Bang hang hiam cih leh aman’ khutdawt ngetna pan a ngah sumte khempeuh mizawngte, a ki sam deuh te adingin pia khia kik zel banah kiniamkhiat mahmah ahih manin mi khempeuh in it ciat uh hi.

Nikhat ciangin a inn ah a ciah kik leh a nu leh pa te in a tapa uh na tel nawnlo uh hi. Aman’ zong a mau tapa ahihna gen lo-in om hi. A mah khutdaw ngen khat mah bangin inn ah ciah kik ahih manin a nu leh pa te in a tel nawnlo ahi hi. A tapa uh ahih lam a tel loh uh hangin a nu leh pa te in Alexius ii mizawngte tungah hehpihna a neih na hangin a inn uh ah om sak uh hi. A hih hangin a tapa bangin a om sak hilo in inn sung kahleii ngei kiu khat ah om sak in sila bangin na sem sak uh hi.

Alexius in a pua lam zong pai khia ngei khol lo hi. A pusuak sun sun ciangin Biakinn ah thungen ding leh naupang te Pasian thu hilh ding bekin pusuak hi. A inn a om a inn nasem te in amah tel lo uh ahih manin simmawh bawl uh hi. Tua bangin inn nasem te’ simmawhna te a man a nu leh pa te kiangah zong gen se lo-in ki niamkhiat takin thuak hi.

AD 412 kumin Rome, Italy ah Alexius si hi. Alexius pen gilkialna leh mite’ thupi simlohna hangin a si hi a, amah a sih ciangin ama kiang pan lai khat ki mu hi. A nu leh pa te in tua lai a et uh ciangin a tapa uh ahih lam thei pan uh hi. Misiangtho Alexius pen khutdawhngente a huh Misiangtho hi.

Misiangtho Alexius aw….kote adingin thu hong ngetsak in.