Misiangtho Agnes of Montepulciano Pawini. (April – 20)

Misiangtho Agnes in 1268 kumin, Italy gam, Gracciano ah suak hi. Ama nuntakzia pen lamdang mahmah hi. Agnes kum (4) a phak hunin Vantung thungetna leh Ave Maria thungetna te hoih takin ngen thei ta hi. Tua banah amah in naupang dangte bangin kimawl ding khawng lunggulh se lo-in, a neu tung pan thunget a deih mahmah khat ahi hi.
Kum (6) a phak ciangin Agnes in nungak siangtho sang lut dingin a Nu leh Pa te kiang a kut hangin naupang lua lai ahih manin tawm vei a ngak lai nading a Nu leh Pa te in gen uh hi. Kum (9) a cin ciangin Agnes pen pawlpi thukhun palsat in Franciscan nungak siangtho te in amau kiangah na sang uh hi. Tua bangin amau ki pawlna ah a sanna in Agnes ii Pasian deihna a zuihna leh a kum tawh ki tuak lo takin a om theihna hang ahi hi. Thukhun ah pen kum tua zah tawh nungak siangtho sang te ah ki sang lo hi.
Agnes in ama siangthona, gamtatna leh amah a ki phatna te pen adang nungak siangtho te’ etteh zawh ding zah dongin lakkhia zo hi. Kum (15) a phak ciangin Agnes pen amau kipawlna sangpi ii Siapinu hong suak hi. Amah in kum (15) sung tawntung, ki deekna tawh kalsuan in tui leh pongmoh bek ne a, leitang in ama lupna hi-in, suangtum in zong ama lukham ahi hi.
Tonu mangmuhna te zong ngah a, tua a mangmuhna sungah vantungmi te in amah Siangtho Pumpi a piakna zong mangmu hi. Tua banah amah in a mangmuhna sungah aman’ naungek Jesu tawi in mu a, a khanglawh ciangin amangmuhna sunga naungek Jesu ii a oak, singlamteh pen ama khut sungah na om hi.
1317 kum in Sr. Gyi Agnes si a, ama han ah na lamdang tampi piang hi. Amah a sih zawh kum tampi khit ciangin ama luang pen biakinn sungah tuah kik uh hi. Tua bangin a tuah hun in Agnes ii luang in kisia lo-in om hi.
Misiangtho Agnes aw…kote adingin thu hong ngetsak in.