Catholic Nisim Lungdamna Laisiangtho. Zehtan hun Nipi Kaal (5) Na. 22.3.2024(Fri)

John 10:31-42
31. Jew mite in amah deng dingin suang a tawm leuleu uh hi.

32. Jesu in, “Keimah in Pa’ kiang pan na thupi tampi kong lak zo hi. Tuate’ lakah bang thu hangin suang tawh kei hong deng ding na hi uh hiam?” ci-in a dong hi.

33. Jew mite in, “A pha na bawlna hangin kote in suang tawh nang hong deng ding ka hi kei uh hi. Ahi zongin nangmah in mihing hi lel napi-in Pasian bangin na kibawl a, Pasian leh a siangtho nate na gensiat manin kote in suang tawh nang hong deng ding ka hi uh hi,” ci-in a dawng uh hi.

34. Jesu in, “Note’ Thukham sungah, ‘Note in pasiante na hi uh hi, ka ci zo hi,’ ci-in kigelh hilo ahi hiam?

35. Pasian’ thu ama tungah a tung mite, pasiante kici ahih leh, Lai Siangtho kinial thei lo ahih manin,

36. Pa in sehtuamin hih leitung ah a sawl keimah in, ‘Pasian’ Tapa ka hi hi,’ ka cih ciangin note in bang hangin, ‘Pasian na gensia hi,’ hong ci thei na hi uh hiam?

37. Keimah in ka Pa’ na ka sep kei leh, kei hong um kei un.

38. Ahi zongin, tua na lamdangte ka bawl leh, note in kei nong um kei uh zongin tua ka bawl na lamdangte na um un. Tua ka sep ka bawl na lamdangte’ hangin kei’ sungah Pa om a, Pa’ sung ah zong kei ka omna thu note in na theician ding uh hi,” a ci hi.

39. Tua khit ciang in amaute in amah matna ding a hanciamkik uh hangin amaute’ khut pan amah a suakta hi.

40. Nidang a, John in a tuisawpna mun Jordan gun gal ah Jesu a paikik hi. Hih lai-ah amah taam a,

41. mi tampite ama kiangah a va pai uh hi. Amaute in, “John in na lamdang a lah ngei loh hangin amah in hih mipa’ thu a gen khempeuh a man hi,” a ci uh hi.

42. Tua lai-ah mi tampi in Jesu a um uh hi.

Hi in Topa' Lungdamna Laisiangtho ahi hi.