Misiangtho John of God Pawini. (March - 8)

Misiangtho John of God in Portugal gam ah 1495 kumin suak hi. Spain galkap sungah lutin tua lai ah gamtatsiatna tuam tuam te a muhna pan a lungsim kikhel in Pasian deihna bangin nuntak ding a khensat khat ahi hi. Kum (40) aphak hunin ama nuntakna khempeuh, Pasian tungah ap ding cih lunggulh mahmah hi. Ama thu bulphuh in nisim nuntakna ah Pasian amuh nading ahi hi.
John in Spain gamah a hawhna pan, Avila khuami John ii thugen ngai-in nuntakpih hi. Amah in ama mawhna te hangin kisikkikin mipi mai ah amah leh amah ki sat gawp ding khentat hi. Tua bangin ahih ciangin lungsim damlo hi ci-in kipawlna khat in amah manin inndei khat ah khum uh hi.
John of Avila in tua thu a zak ciangin John kiangah pai-in tha pia hi. John of Avila in John ii thu teng a theih ciangin tua bangin amah leh amah mawhna dan ki piak sangin ama huhna a kisam mite huhna pia in a kep nading genpih hi. Tua ciangin John of God in ama khentatna laih kik hi.
John of God in azawngkhal, a damlo mite huh nading zato khat phuan in a lungsim khempeuh tua nasepna sungah koihin damlo mite ading in na sem hi. Ama ii Pasian thu hanciamna hangin mi tampite’ huhna ngah hi. John ii phuat zato in numei paktatte ading hi aa, tua nasepna adingin John in lawptakin nasem in kipiakhia hi cih thu Granada Siadawpa in a zak ciangin John samin thu hilh hi.
Tua ciangin Siadawpa kiangah John in “Mihing tapa in mawhnei mite adingin hong pai hi. Amaute a kikhel na dingin hanciam ding ahi hi. Hih nasepna sem lo in om leng Pasian hong sapna ah a citaklo mi ka hi ding hi. Kei longal, ka zato ah a ginalo mi ka thei kei hi” ci-in gen hi. Tua pankipan tua Siadawpa in John ii nasepna ah tha lawptakin apanpih khat hong suak hi.
John in gun tuihualpi sungah tui akia mi khat a hotkhiatna pan damlo suakin 1550 kum, March 8 ni-in ama zato huang sungah a om thungetna inn sung, Pasian tau mai ah khukdin in thu a nget kawmin si hi.
Misiangtho John of God aw…Ko te adingin thu hong ngetsak tan.