Catholic Nisim Lungdamna Laisiangtho. Zehtan hun Nipi Kaal (4) Na. 10.3.2024(Sun)

John 3:14-21
14. “Moses in gamlak ah gul a khai bangin Mihing’ Tapa a kikhai ding hi.

15. Tua ahih manin amah a um mi peuhmah in nuntak tawntungna a ngah ding hi.

*16. “Pasian in leitung mite it mah mah ahih manin a Tapa a um mi khempeuh kisia loin nuntak tawntungna a ngahna dingun khat bek a neih a Tapa a pia hi.

17. A taktakin leitung mite a mawhsak dingin Pasian in hih leitung ah a Tapa hong sawl hilo a, ama hangin hotkhiatna a ngahna dingin hong sawl ahi hi.

18. Amah a um mi in mawhsakna thuak lo hi. Ahi zongin amah a um lo mi ahih leh, tu nangawnin mawhsakna a ngah khin zo hi. Bang hang hiam cih leh, amah in Pasian’ Tapa khat bek’ min um lo hi.

19. Thukhenna thu in hih bang ahi hi: Leitung ah khuavak hong pai khin zo hi. Ahi zongin mihingte in siatna gamta uh ahih manin khuavak sangin khuamial a deihzaw uh hi.

20. Siatna a gamta mi khempeuh in khuavak mudah uh a; amau gamtat siatnate a kilat lohna dingin khuavakna ah pai lo uh hi.

21. Ahi zongin thuman a a gamta mi peuhmah in ama gamtatna Pasian’ deihna tawh kituak ahihna a kilatsakna dingin khuavak ah a pai hi,” ci-in a gen hi.

Hi in Topa' Lungdamna Laisiangtho ahi hi.