Misiangtho Wilfrid pawini. (October – 12)

Misiangtho Wilfrid in 634 kumin Northumberland ah suak hi. Anu sih khit ciangin nukik nei hi. A nu kikin amah simmawh bawl in, nisim in tawng den, taai den hi.
Kum 13 aphak ciangin Wilfrid in a nukik thuak zo nawn mahmah lo ahih manin a pa kiangah, Pa aw, galkap van teng a kimin hong pia inla, ka tuan nading sakol zong hong pia in. Galkap suak nuam ingh. Tua hi leh inn pan nisim ka paikhia thei ding hi. Galkap sinna ka man khit ciangin kumpipa maiah ama hong zat theih dingin kipumpiak nuam ing” ci-in a nget ciangin a pa in hehpih huaisa ahih manin a tapa nget teng pia hi.
Tua ciangin Wilfrid in a nu theih loh kaalin nisim galkap kisinna nei den a, kum hong tam ciangin kumpipa in ama galkap dingin ahuang sungah om sak hi. Galkap hihna pan a sawt pian khit ciangin Wilfrid in cimtaak ahih manin kumpipa kiangah gen hi. Kumpipa in “tua bang ahih leh pilna na sin nuam hiam? Lai na sin nop leh Zateih te tawh a kibangin amau pilsinna sangah kong kahsak ding hi” a cih leh Wilfrid zong thukim pah hi.
Wilfrid in Zateih te kiangah kum tampi sung pilna a sin khit ciangin Rome ah ama khe ngiat tawh va pai aa, haksatna tampi tuak hi. Rome a tun ciangin Pope tawh ki mu thei pah uh a, Pope in siampi suaksak hi. Tua khit ciangin England ah ciah kik in, a khualzinna mun aa amuh khempeuh genin nuamsa mahmah hi.
Khatvei alawmpa Alfred in Wilfrid gam lianpi khat amawkna in pia hi. Tua mun pen Stamford hi in Wilfrid in tua mun ah zateih sang lianpi khat lam aa tua sangah Benedictine zateih te om sak hi. Tua sang pen England gamah Zateih a kici Pasian nasemte a om masakna uh ahih manin mipite in lunglut thei mahmah uh hi.
Wilfrid kum (30) a phak ciangin Siadaw dingin teelna ngah ahih manin Paris ah paipah hi. Siadaw a suah khit ciangin Tembaw tawh England ah ciahkik hi. Lamkaal ah huihpi guahpi nasia lua in a tuanna tembaw nuai gawp ahih manin tuipi nawlkhat piauneel munah khawl uh hi. Tua mun pen Saxon minamte tenna hi in, amaute in Pasian bia lo uh hi.
Saxons minamte in piauneel lakah tembawpi amuh uh ciangin van gu dingin lawp takin tai suk pah uh hi. Wilfrid in tua te amuh ciangin hi bang in thu gen hi. “Na ngai un lawmte aw, ko pen Pasian siampi vive ka hi uh hi. Bang mah ka nei kei uh hi. Tua ahih manin tuipi tungah nuam takin hong paisak unla, ka omna gam uh ka tun uh ciangin sum tampi hong khak ding hi ung” ci hi.
Tua laitakin dawi siampi khat zong hong pai in tembaw tunga tuangte in Christian vive ahihna a theih ciangin a galpanin hamsiat gawp hi. Wilfrid in tua dawi siampi pa amuh hangin thudon lo-in agen nop teng gen veve hi. Ahi zongin tembaw nasem khat in suangtum tawh dawi siampipa na deng ahih manin dawi siampipa sipah hi.
Tua ciangin Saxons te hong diang suk pah uh a, nasia takin kido in Wilfrid leh a pawlte in zo veve uh ahih manin inn lam zuanin ciah thei uh hi. A tun uh ciangin Pawlpi in Wilfrid pen York khua siadaw dingin koih uh ahih manin tua hun akipan Wilfrid pen Bishop of York ki ci hi.
York khua a tun ciangin Wilfrid in Cathedral biakinn pi pen kipuah hetlo in a om na leh thuzuite sungah Pasian thu a kin lua zong a omlohna mu hi. Tua ahih manin Wilfrid in thuzuimi teng khempeuh kaikhawm in hi bangin thu gen hi. “Na mai uh zum lo ahi hiam? Bang hangin biakinn puah lo na hi uh hiam? Na innte uh en un. Ih biakinnpi sangin a siangtho leh a etlawm zaw vive hi lo hiam? Na innte uh hoih takin kemin puah na hih uh leh Ih Pasian ih biakna ih biakinnpi bang hangin kep loh zuun loh in nusia na hi uh hiam? Hih a kipuahlo biakinnpi sungah Missa ngaiin Siangtho Pumpi na sang uh hi. Hamphatna ngah dingin zong na kilawm kei uh hi. Tua ahihman in mawhnadan lohna dingin ih vekin ih biakinnpi ih puah kik ding hi. Tua masiah hih biakinnpi sungah Missa ka bawl kei dinga, kuamah in Siangtho Pumpi na sang kha kei ding uh hi” ci hi.
Tua ciangin thuzuite in a khialhna uh kiphawk in hanciam takin Cathedral biakinnpi puah uh a, aman khit uh ciangin Siadaw Wilfrid in Missa bawlsak hi. Tua ni pankipan biakinnpi sungah Missa kibawl den ta hi. Ahi zongin a lungkimlo pawl khat mah na om veve uh ahih manin Wilfrid in amaute kiangah “va ciah unla, sathau manpha Jesu khe phungah a kisukkhapna thu na sim un” ci-in a lungkimlo mite ciah sak hi. Tua ciangin Pasian ih biakna biakinn pen hoih tak leh siangtho takin ih lam ding a thupitna mipite in telzo pan uh hi. A.D 710 kumin Wilfrid si hi.
Misiangtho Wilfrid aw…kote adingin thu hong ngetsak in.