Vantungmi Michael, Gabriel leh Raphael te pawini. (Archangel) (September 29)

Kha bek anei vantungmi te in leitung aom ma pekin asang pen in Pasianin apiangsak te ahi uh hi. Amau te in pumpi nei lo in kha bek hi a, amau te’ nasep tawh kizui in Pasian in min pia hi. Kua in Pasian tawh kibang hiam cih min anei Michael in dawi te ado dingin sawlna ngah a, Pasian hih na a luhnuam Lucifer pen vantung gam nopsakna pan hawlkhiat ding za piak na ngah hi.
“Tua ciangin vantungah gal kidona piang a, Michael le a vantung mite in tua gulpi-ling-nei a do uh hi. Gulpi-ling-nei le ama nung a zui a vantung mite in zong a do thuk uh hi. Ahi zongin gulpi le ama nung a zui a vantung mite in lel uh a hih manin vantung gamah a omna ding mun ngah zo nawn lo uh hi”. (Rev 12:7-8). Vantung mi Michael in ih nisim nuntakna sungah satan tawh ih ki do na ah hong hun den hi. “Tua satan in nitawp ni ciangin gal lel ding hi”, (Rev 20:11).
Pasian vangliatna ahi vantung mi Gabriel in Pasian vangliatna a tangko dingin sawlna ngah hi. A mahin Tonu Maria kiangah Topa Jesu a suah na dingin thu aza sak vantung mi hi. Tonu in amah nungak siangtho ahih na agen ciangin vantung mi-in “Bang hang hiam cih leh Pasian’ aadingin ahi thei lo bangmah om lo hi”, ci-in dawng hi. (Lk 1:37). Vantungmi Gabriel in lungdamna thu a tangko te huh in lamet bei na tawh ih ki tuah ciangin hong huh hi.
Pasian siavuan pa cih min nei vantungmi Raphael in pumpi leh kha dam lo te a huh dingin vaipuak nei hi. A mah in Tobitas apai na lampi tawntungah kem in Tobias mopawi nitak in dawi khutsung pan hon khia hi. Tobit ii mit zong khua musak kik a, amah vantung mi ahih na a lah khit ciangin Tobit kiangah “kei mah in Raphael ka hi a, Topa’ minthanna mai-ah lutin, a dingden vantung mi sagihte’ lakah khat ka hi hi”, a ci hi. (Tobit 12:15).
Vantungmi Michael, Gabriel, Raphael te aw...Kote adingin thu hong ngetsak un.