Misiangtho Philomena Pawini. (Aug 11)

Khat vei lai-in dawi bia Kumpipa leh a zi in Greek gam, Corfu tuikulh ukin aom lai takin a kum uh a tam semsem dong ta khat zong nei thei lo-in om uh hi. Amaute in dawi thoihin ta anget uh hangin nei tuan lo uh hi. Ni khat siavuan leh Pasian thu gen khat ahi mikhat in kumpipate nupa kiangah Topa Jesu thu genin Jesu kiangah thu a nget na dingun sawl hi.
Kumpipate nupa zong tuisawpna sangin thunget a kipat zawh a sawt lo-in kumpipa zi in naupaai pah hi. Nau asuah ciangin naupang min dingin “khuavak a deihmi” cih khiatna anei Philomena ci-in phuak uh hi. Christian upna tawh a khangto Philomena in amel hoih mahmah naupang khat ahi hi.
Thungen kawm, Pasian thusin kawm, kimawl kawmin Philomena in kum (13) a phak ciangin a nulepa te tawh Roma ah pai uh hi. Roma apai na thu in Emperor Diocletian in Philomena ii pa pen gal tawh liingphawng ahih manin kilemna bawl dingin Diocletian tawh kimu dingin a pai uh ahi hi. (Kumpi leh Emperor a ki lamdangna in kumpi te in gam khat bek uk uh ahihman in kumpi ki ci aa, Emperor cih ciangin Roma Emperor ah thu nei pen cihna hi.
Kilemna ding thu kikum dingin Emperor in kumpipa sam hinapi kumpipa tanu amuh ciangin kumpipa kiangah nakhat nong huh zo diam ci-in a dot leh kumpipa in kong huh zawh uh ahihleh hong huh ding hi ung a ci hi. Tua ciangin Emperor in Philomena tawh a kiteen sak nading kumpipa kiangah ngen hi. Philomena in tua thu nial dingin ahanciam hangin a pa in pau khuan zong pia lo hi.
Inn a ciah kik khit uh ciangin Philomena in a lupna ah khukdin in a kah kawmin a nulehpa kiangah kei Pasian bek tawh kiteeng dingin ki ciam khin ka hih manin midang kuamah tawh ki teng lo ding hing ci-in nial hi. Ahi zongin Philomena in Emperor kiangah pai kha veve hi. Philomena in Emperor kiangah kei in Pasian tawh ki teeng ding ka hih manin nang tawh ki teng zo kei ning ci-in a gen ciangin Emperor heh lua aa, Philomena thong sungah khum hi.
Emperor in Philomena a teenpih zawh nading atuamtuam tawh a hanciam hangin Philomena in Pasian bek ka ki-ap ding hi, midang kuamah ka teenpih zo kei ding hi ci-in hangsan takin a gen ciangin Emperor heh semsem aa nasia takin Philomena bawlsia hi. Philomena in thong sungah mang muhna khat ngah hi. Tua in Tonu Maria ama kiangah pai-in amah hopih aa, nang ading mun vantung gamah om hi ci-in Tonu in gen hi.
Philomena in bawlsiatna nasia takin thuak ahih manin hong sang ta ding hi ci-in Emperor in lametna tawh a dot leh ama lamet bang hi lo-in Philomena in na nial ve ve hi. Tua ciangin khuam khat ah khau tawh hen cipin nasia takin sat gawp uh hi. Si dektakin a sat gawp khit uh ciangin Emperor in a galkapte khawl sakin thong sungah a koih kik nading un thupia hi. Thong sungah Philomena ii liamma te vantungmi te in bawl sak ahih manin bang mah a ci lo bangin angei bangin hong om ciangin galkapte in Philomena ii Pasian in Pasian tak tak hi ding hi ci-in ki gen uh hi.
Angei abang kik Philomena amuh ciangin Emperor in khuam ah khihsakin galkap thumte Thaltang tang khat ta pia in kap sak hi. Ahi zongin Philomena a si tuan kei hi. Tua ciangin guam thukpi aom na mun, gun ah paipihin Philomena ii ngawng khau tawh hen sak a, tua khau mong te ah suang zum khat ta a hensak khit ciangin tua suang zum khau gun sungah khia suk sak hi. Tua bangin suang khau tawh Philomena gun tui sungah khia suk hi. Emperor in tu in bel Philomena in lau in ki teen ding hong sang ta ding hi ci-in ngaihsun hi. Ahi zongin ama ngaihsutna leh apiang thu na kilehbulh banah tua gun tui sung panin Philomena kah to kik zo hi.
Tua thu piang te hangin tua lai aom mite in lamdang sa mahmah uh a, mi tampi Christian sungah a lut uh ciangin Emperor hehna lian semsem hi. Tua ahih manin Philomena asih dongin thal tawh akap na dingun a galkapte thu pia hi. Ahi zongin Thal tang khat mah in Philomena akha kei hi. Emperor heh tektek aa, mei thal tawh a kap na dingun galkapte thu pia leu leu hi. Ahi zongin tua mei thal te in Philomena kha lo in amah a kap galkapte lamah kilehkik in galkapte si khin uh hi. A nunung ciangin Philomena ii ngawng tan dingin thupia aa tua tawh Philomena in ngawngtan in thahna thuakin si hi. Hih thu piang amu Roma galkapte in Pasian khat bek hong um uh aa, Philomena ii lam lahna hangin mitampi Christian sungah lut uh hi.
Tua hi aa, Philomena ii han ah suang zum leh Thal tang lim ki suai in hi lim te in Philomena in nungak siangtho khat hi in, Upna hangin thahna a thuak ahihna, Christian te ading ciaptehna khat ahi hi.
Theih ding….
Philomena pen Catholic Calendar sung pan in ki hemkhia hi. Hi bangin a kihepkhiat hangin Misiangtho hi lo cihna hilo hi. Ama thu a ki kankikna ah kisapna a om manin a ki hemkhia ahi hi. Ahi zongin Siampite pawi ih bawl sak ni ahi, Misiangtho John Mary Vianney thu sungah John Vianney in Misiangtho Philomena beelin thu ngen den hi, Philomena in Misiangtho John Vianney ii a belh mahmah Misiangtho ahihna ki mu thei hi.
Misiangtho Philomena aw…Kote adingin thu hong ngetsak tan.