Misiangtho Anthony Mary Zaccaria Pawini. (July 5)

Misiangtho Anthony Zaccaria in 1502 kumin Italy gam ah suak hi. Apa in aneu lai in sihsan ahih manin a Nu in ama kha lam khantoh na dingin panpih hi. Anthony in mizawngte tungah hehpihna anei mahmah khat ahi hi.
Anthony in Padua khua ah zatui lam tawh kisai pilna sin aa kum 22 a phak ciangin sang manin ama sin pilna siamna te tawh mite cidamna apia dingin inn ah ciah hi. Ahi zongin tua hun in alungtang sungah amah in mite pumpi dam nadingin a sep Sangin mite kha cidam nadingin a sep nading sapna angah lam tel khia hi. Tua bangin alungtang sungah aphawkna tawh kizui in amah in Pasian thu te hoih tak kanin khangnote Pasian thuhilhna kipan hi.
1528 kumin Siampi suak aa, Milan khua ah pai-in a vakvai numeino te hotkhiatna nading cih ngimna tawh a ki phuan numei pawlkhat te kipawlna pen Anthony in huhin panpih hi. Kum 2 asawt khit ciangin “Pasian thu genna, mite in Sacramentu te ki lawm ki tuak takin a san theih nading in panpihna tawh pawlpi thaksuah sak ding” cih ngimna tawh alawm siampi nihte tawh kipawl in “Clerks Regular of St. Paul” ki pawlna phuankhia uh hi.
Tua kipawlna ii phualpi pen St. Barnabas Biakinn ah om ahih manin amau kipawlna pen Barnabites ci-in minthang hi. Amaute in Biakinn te, Sumbuukte ah Pasian thugente huhna zong sem uh hi. Anthony in sunlezan khawllo in hanciam takin Pasian na asep na tawh a tha bei-in 1539 kum, ama kum 37 in si hi.
Misiangtho Anthony Mary Zaccaria aw…kote adingin thu hong ngetsak tan.