Catholic Nisim Lungdamna Laisiangtho. Hun Nautang Nipi Kaal (12) Na. 1.7.2023(Sat)

Matthew 8:5-17
5. Capernaum* khuapi ah Jesu a tun ciangin galkap za khat ukpa khat ama kiangah hong pai a,

6. “Topa aw, ka nasempa khat a pum zawin inn ah lumcip-a a gim mahmah hi,” a ci hi.

7. Tua ciangin Jesu in ama kiangah, “Kei hong pai-in amah ka damsak ding hi,” a ci hi.

8. Galkap za khat ukpa in, “Topa aw, ka inn sungah nong lut dingin ka kilawm kei hi. Ahi zongin na kam bekin thu hong pia lecin ka nasempa a dam pah ding hi.

9. Bang hang hiam cih leh, keimah in thuneihna nuai-ah ka om a, keima khut nuai-ah zong galkapte a om hi. Khat kiangah, ‘Hong pai in,’ ka cih ciangin hong pai pah hi. Ka nasempa’ kiangah, ‘Hih sem in,’ ka cih ciangin a sem hi,” a ci hi.

10. Ama thugen Jesu in a zak ciangin lamdangsa a, amah a zuite’ kiangah, “A man takpi kong cihin ah, hih zah upna lian a nei khat beek Israel mite’ lakah ka mu ngei nai kei hi.

11. Ken kong genin ah, nisuahna le nitumna pan mi tampi hong pai-in, Abraham, Isaac le Jacob-te tawh vantung gam gualnopna sungah a tu khawm ding uh hi.

12. Vantung gam a luah ding mite ahih uh leh, a pualam khuamial lakah kilawnkhia dinga, tua lai-ah kahna le hagawina a om ding hi,” a ci hi.

13. Tua ciangin Jesu in galkap za khat ukpa’ kiangah, “Ciah in, na upna bangin hong piang ta hen!” a ci hi. Tua hun laitak mahin a nasempa a dam pah hi.

14. Peter’ inn ah Jesu a lut ciangin, Peter’ sungnu cisanatin lupna ah a lum a mu hi.

15. Jesu in a khut a lawn ciangin a natna dam pah a, amah tho-in zin a do hi.

16. Nitak lam ciangin dawivei mi tampi ama kiangah hong paipih uh a, kam khat a genziauna bek tawh dawite hawlkhia-in cinate khempeuh a damsak hi.

17. Hih in kamsangpa Isaiah’ tungtawn a, “Amah in eite’ natnate lakhia-in eite’ gimnate a puakhia hi,” ci-in a genkholhna a tangtunna ahi hi.

Hi in Topa' Lungdamna Laisiangtho ahi hi.