Misiangtho Fidelis Pawini. (April 24)

Franciscan Capuchin kipawlna I amasa pen Misiangtho ahi, Fidelis in 1577 kumin, Germany gam ah suak hi. Amah in “mizawngte’ sitni” cih min tawh ama nuntak nadingin sitni sem hi.  1612 kum ciangin ama nuntak nasep ahi sitni nasep nusia in Capuchin kipawlna ah lut aa, tua kipawlna pan Siampi suahna za ngah hi.

Fidelis in ama nuntakna sungah ki sikkikna, thungetna tawh kalsuan hi. Amah in a tawntung in Pasian thu gen ding leh mawhsutna ngai dingin sapna ngah den hi. Thadahna tawh a kipelh na dingin amah in “lingkual lukhu a khu, ka Bupa(Topa Jesu) I na kasepna ah kei mahin lung lut lo-in na a sem khat ka hih khak leh ka tungah siatna hong tung ta hen” ci-in gen den hi.

Kipawlna khat I ngetna hangin Fidelis in Switzerland gam a om Siangtho Pumpi a sang (letkhan) nuamlo mite lakah Pasian na sem dingin om hi. Amah in Pasian na sepna ah thu gen na sangin thungetna in muibun zaw hi cih tel ahihmanin ama hun atamzaw pen Siangtho Pumpi mai ah bei sak hi. Protestants te tampi pawlpi sungah hong lut ciangin Fidelis a langpang te in amah thahsim ding sawm uh hi.

1622 kumin khua khatah Pasian thu a genna ah aman’ Catholic pawlpi in pumkhat hi-in a kip na thu, Pumkhat ahi suangpi tungah ki phutin a zung thukin a kipna thu, Vantung leh Leitung a bei zongin Catholic upna cikmah hunin bei ngeilo ding ahih na thu te gen hi.

Tua khua pan Seewis khua ah pai suak aa, a paina lampi ah Catholic upna a langpang mi pawlkhat tawh kituakin tua mun mahah tua mite’ thahna thuak hi. Thahna a thuak ma-in Fidelis in amah a that ding mite ading thungetsak hi. Amah a ki thah zawh ciangin tua mithahna thu teci a pang ahi, Siangtho Pumpi a um lo te Makaipi pa in Catholic Pawlpi sungah hong lutna in Misiangtho Fidelis ii Pasian a ding leh upna hangin thahna a thuakna ii amasa pen gah ahi hi.

Misiangtho Fidelis aw…Kote adingin thu hong ngetsak tan.