Misiangtho Vincent Ferrer Pawi ni. (April 5)

St. Dominican Zateih congregation pan aminthang pen thu gen siam ahi, misiangtho Vincent Ferrer in 1350 kumin Spain gam, Valencia khua ah suak hi. A nulepa te in Vincint pen mizawngte a it theih nading, Nithum ni (Wed) leh ki ginni (Sat) te in an atan nading leh Topa Jesu leh Tonu Maria a zahtak nading in thuhilh in makaih den uh hi.
Vincent in 1374 kumin St. Dominican Zateih sangah lut in a minthang mahmah thugen siam khat hong suak hi. Ama thugenna te in mun khempeuh ah a lamdang takin gualzo in minthang mahmah hi. A lawm Siampite kiangah Vincent in “thu na gen uh ciangin siangtho in mite tel baih ding kammal te zangin, gentehna zangin thu gen un. Thu ngai mipi te khat ciatin ama kiang bek ah thu a gen bangin a ngaihsut zawh dongin gen un. A haksa kammalte na zat uh leh thu ngai mipite in tel zo lo ding uh hi” ci-in hilh hi.
Misiangtho Vincent in Europe gam sung, mun tuamtuam ah pai kawikawi in mawhna thu, sihna thu, hell meikuangpi thu leh tawntung nuntakna thu, mihingte in damdam in thu khenna lam manawhin khual a zinzin ahih na thu te a diakdiak in gen hi. Ama thugen a ngai mipi a tamzaw in amaute mawhna pan kisik kikin mawh sut pah nopna lungsim aneih zah dongin thugen a siam Misiangtho khat ahi hi.
Siampi tampi takin amah tawh khualzin khawmin ama nasepna te ah huh uh hi. Vincent in amah tawh khual azin khawm Siampite kiangah “mawhsutna na ngaih uh ciangin a tawntung in itna na bulphuh ding uh hi. Note in a thanem mite nunnem takin tha na pia uh ahi zongin, a lungtangkhauh mite Pasian a zahtak nangun thu na hilh uh ahi zongin, note in amaute tungah a siangtho itna tawh tha apia na hihna uh a tel na dingun na gen ding uh hi” ci-in vaikhak hi.
Misiangtho Vincent Ferrer in Kha lam tawh kisai amah leh amah kiniamkhiat in agelh laibu sungah “Kei-in pumpi leh Kha sungah natna tampi tawh a kidim mi khat ka hi hi. Kei sunga om na khempeuh in muatin, kisia in, gim namsia te pusuak hi. Ka mawhna te leh ka thuman lohna te hangin a kihhuai mi ka hi hi” ci-in gelh hi.
Misiangtho Vincent Ferrer in 1419 kumin Piantit gam, Bannes khua ah a nunung pen thu a gen laitakin si hi. Amah pen thongkia te leh Nga bengte ahuh Misiangtho in ki ciamteh hi.
Misiangtho Vincent Ferrer aw….Ko te adingin thu hong ngetsak tan.