Misiangtho Francis of Paola Pawini. (April 2)

Misiangtho Francis in 1416 kumin Italy gam, Paola khua ah suak hi. A nulepa te in ta aneih theih nading un kum tampi sung Misiangtho Francis Assisi beelin thu ngen uh aa tapa khat aneih uh ciangin amin dingin Francis phuak uh hi.
Francis in kum (16) aphak ciangin gungei a om suanghawm khat sungah zateih khat bangin Pasian thu lungngai in om hi. Ama siangtho’ na leh Pasian thu ahanciamna hangin mitampi in ama nung zui uh a, ama-sa pen in “aneu pen te” cih kipawlna phuankhia hi. Tua kipawlna min dingin “aneu pen te” cih min aphuah na in amau leh amau Pasian pawlpi sungah aneu pen cih alah na ahi hi. Amau te in leilak ah lupna leh antan na te tawh a khauh mahmah thukhun te zui-in nungta uh hi.
Francis in “ulenau te aw, leitungin Kha thu lam i et den na dingin hong hilh hi. Sihna pen ahi takpi ding thu, kuamah in a pelh zawh loh ding thu hi. Mihingte’ nuntakna in tomno sung bek hi a, mei khu bangin damdam in bei mang ding hi” ci-in anungzui te tungah gen hi. AD 1481 kumin Francis in damlo in a si dektak a hi Piantit gam kumpi Louis XI ii sapna tawh Piantit gam ah pai hi.
Francis in kumpi pa kiangah “kumpi te’ nuntakna nangawn ciangtan hun om hi. Pasian khat bek in tua nuntakna te nei hi” ci-in gen hi. Kumpi Louis in anatna pan a dam siang kei hangin Pasian khut sungah nuam takin asih ding a kisapna thu Francis tung pan thei khia hi. Kumpi Louis a sih khit ciangin ama za alaih kumpi Charles VIII in Francis pen ama thukuppi dingin mun pia a, Piantit gam leh Italy gam te ah zateih sang te lamsak hi. Paola khua mi misiangtho Francis in AD 1507 kumin si hi.
Misiangtho Francis aw…Ko te a dingin thu hong ngetsak tan.