Misiangtho Turibius of Lima Pawini. (March 23)

Misiangtho Turibius in Spain gam ah 1538 kumin suak hi. Amah pen lai a zo mahmah mipil khat hi aa, Upadi (Law College) sangpi ah Professor sem hi. Tua khit ciangin Catholic Pawlpi tawh kisai thukhenzum lamah sem leuleu hi.
1581 kumin Catholic thuzui khat (layman) ahi Turibius pen Lima khua Siadaw dingin kiseh hi. Tua ahih manin Ordination te khat khit khat asang khit ciangin Siadawpi dingin kipsak in Lima khua lam manawhin Pasian na sem dingin kuankhia hi. Tua khua ah kum (25) sung, Pasian ading leh aminamte adingin a nuntakna piakhia hi.
Lima khua a tun ciangin Turibius in haksatna tampi thuak pah hi. Ama uk Diocese pen zai mahmah aa, mite in lah Pasian thu na lungngulh nawnlo in neksim ding bek lunggulh in nasem uh hi. Amaute pen Catholic thuzui minpua te bek hi uh aa, amau khut nuai aom Indians te pen naakpi takin nasem sak in simmawh bawl mahmah uh hi.
Turibius in lauhuaina, haksatna te awlmawh lo-in a khe mah tawh ama Archdiocese sungah pai kawikawi in, thuzui mite inn ah hawhin, thuneite kiangah thuhoih tampi gen pih den hi. Turibius in siatna tampi a veng sak banah amau gamah a masa pen Siampi sinna Sanginnpi Seminary khat phuan hi. Mizawngte tungah cinghin, Indians te panpih aa, mihau te leh mi tatsia te dawpbawl lo hi. Indians te kampau sinin, amau kam tawh Pasian thu gen hi. Tua ahih manin ama thugen te in mipite lungsimtawng thuk bun mahmah hi.
Christian ahi lo Indians te in amau lak a om Christian te ginalo lua uh ahihmanin Christian suah ding peuhmah ngaihsut in nei lo uh hi. Ahi zongin Turibius ii itna hangin mi tampi Christian suak zo uh hi. Turibius pen thuman in hangsan mahmah ahihmanin mihaute tawh ki thutuak thei lo hi. Tua ahih manin mihaute in Rome ah laikhak uh aa, Siadaw Turibius pen amau kiang pan a lakkhiat nading un ngetna lai bawl uh hi. Ahi zongin Rome in amau ngetna na thupisim sak lo ahih manin Turibius Lima ah om suak a, mizawngte leh misiangtho te in amah it mahmah uh hi. Amah pen Misiangtho Martin de Porres leh Misiangtho Rose of Lima te tawh lawmta ahi hi. 1606 kumin Turibius in Lima khua ah si hi.