Misiangtho Perpetua leh Felicity te Pawini. (March 7)

Misiangtho Perpetua leh Felicity te pen Carthage khua ii a siangtho leh a thupi numei te ahi uh hi. Kum (22) apha Perpetua in tapa khat nei aa, ama inn nasemnu ahi Felicity in nungakno khat ahih banah naupaai khat zong ahi hi. 203 kum, Emperor Severus in Christian te a bawl siat mahmah hunin amaute nih leh Christian sungah lut dingin a ki ging mi thum ahi, Revocatus, Saturninus leh Secundulus te ki man hi. Thong sungah a ki puak ciangin amaute tawh thong sung a lut khawm thuhilh Sia Saturus in amaute Tui Sawpna pia hi.
Perpetua in amau a kimat ciangin a tapa pen a Pa’ khut sungah ap hi. A Pa in ama Christian upna a taisan na dingin a thum hangin Perpetua in ama upna kiptakin len hi. Felicity in thong sungah nuasuak aa, tua naungek pen a lawm Christian te in khoi sak uh hi.
Thukhenpa mai ah amaute in amau upna a pulaak khit uh ciangin amaute gan khawina buuk sungah gan te’ an dingin a ki khiat nading thukhenna thuak uh hi. Amaute in tua gan khawina ah a pai uh ciangin Salan la te sa in khat leh khat kilemna lim kilak khawmin lut uh hi. Amaute sung pan thum in Sahang leh Vompi te ii petlupna thuak uh hi. Perpetua leh Filicity te in Lawi gilo te mai ah khut kilenin ding uh hi. Tua Lawi gilo te’ ki te in amaute pumpi, tam veipi sat uh aa, nasia takin liamna ngah uh hi.
Anunung ciangin amautenih pawi etna tau ii a lai ah paipih uh aa, tua lai ah Tem tawh sat lupna thuak uh hi. Perpetua in amah thah dingin haksa sa in a khut a ling, mithatpa ii Tem tawina khut pen ama ngawng tungah koih toh sak lai hi. Misiangtho Perpetua leh Felicity te pen Nu te a huh Misiangtho te in ki ciamteh hi.
Misiangtho Perpetua leh Felicity te aw…Ko te adingin thu hong ngetsak tan.