Misiangtho Juliana Of Nicomedia Pawini. (February 16)

Misiangtho Juliana in AD 285 kumin Italy gamah suak hi. Juliana cih min ahoih hangin Christian te a kibawlsiat hunin a khangkhia Juliana ii nuntakna hoih hetlo hi. Tua hun pen Roman Emperor Diocletian uk hun hi aa, amah in Christian te a bawl siat mahmah hun ahi hi. Tua hunin upna hangin thahna a thuak nungakno te lakah Juliana zong ki hel hi.
Juliana ii a Pa pen Pasian um lo khat ahi hi. Juliana in Pasian um lo a Pa tawh a omkhop uh hangin amahin Christian upna a sang khat ahi hi. Tua ahih manin Juliana ii Christian upna hangin a Pa heh mahmah aa a tanu bawlsiat kipan hi. Asawt ciangin a Pa in Pasian umlo Roma za nei mikhat tawh Juliana ki teensak ding vaihawm hi.
Tua bangin a Pa vaihawmna Juliana in a nial ciangin a Pa leh tua Roma za nei pa heh mahmah uh aa, a nih un ki pawlin Juliana bawlsia gawp uh hi. Amaute in Juliana pen khau tawh henin sat zel, mei tawh sat zel, Tui sa sungah khia suk zel cih bangin a bawlsiat khit uh ciangin AD 304 kumin a ngawngtan in that uh hi.
Tua ahih manin Juliana lim a ki suaih ciangin Singlamteh len kawm, ama khe nuai ah Gulpi lim a tuang, ahihkeileh sikkual lenin dawi tawh a ki dona lim cih bangin ki suai hi. Misiangtho Juliana pen cinate a huh Misiangtho in kiciamteh hi.
Misiangtho Juliana aw….Kote adingin thu hong ngetsak tan.