Catholic Nisim Lungdamna Laisiangtho. Hun Nautaang Nipi Kaal (5) Na. 9.2.2023(Thur)

Mark 7:24-30
24. Tua mun panin Jesu paikhia a, Tyre le Sidon kimnai-ah a pai hi. Amah inn khatah lut a, ama om lam kuamah in a theih lohna ding a ut hangin ki-imin kisel zo lo hi.

25. Ahi zongin a tanu sungah kha nin lut numei khat in Jesu a omna thu a zak ciangin, thakhatin hong pai a, a khe phungah a boksuk hi.

26. Tua numei, Syria gam Phoenicia a suak Greek mi ahi hi. A tanu’ sunga dawi a hawlkhiatsakna dingin Jesu kiangah a thum hi.

27. Jesu in ama kiang ah, “A masa-in tate in a duh zahzah uh ne masa phot uh hen. Bang hang hiam cih leh, tate’ an nek kim lai laksakin uite piak ding kilawm lo hi,” a ci hi.

28. Ahi zongin tua nu in, “Hi mah hi, Topa aw, ahi zongin uite nangawn in tate’ anneng kiate sabuai nuai-ah a ne uh hi,” a ci hi.

29. Tua ciangin Jesu in ama kiangah, “Tua ci banga na genna hangin na ciah thei hi; na tanu’ sung panin dawi gilo paikhia khin hi,” a ci hi.

30. Tua ahih manin tua nu a inn ah ciah a, a sung panin dawi gilo a paikhia khin a tanuno a lupna tunga lum a mu hi.

Hi in Topa' Lungdamna Laisiangtho ahi hi.