Misiangtho Elizabeth Ann Seton pawini. (Jannuary 4)

Misiangtho Elizabeth Ann Seton in American gammi Misiangtho te lak pan amasa pen Misiangtho ahi hi. Amah in New York mihau innkuan sungpan suakin Episcopalian kipawlna pan ama nuntakna kipankhia hi. Kum (19) aphak hunin mihau William Magee Seton tawh kiteengin ta (5) nei uh hi. Kum (10) val ciang amau innkuan sung nuam mahmahin sepna bawlna te zong lem mahmah hi. Ahi zongin a sawt lo-in William in TB natna tawh sihsan hi.
Abeisa kum tampi sung, Catholic upna a lunglut Elizabeth in 1805 kumin Catholic Pawlpi sungah lut hi. Tua bangin Catholic pawlpi sungah alutna hangin alawm a gualte in amah tel zo lo-in, pawlkhat te in kholhpih nuam nawnlo uh hi.
Elizabeth in a ta te avak akhoi na dingin Boston ah sang khat hong hi. Tua asang pen Pawlpi mintawh a phuat ahih loh hangin Pawlpi kipawlna khat bangin vaihawm hi. Tua bangin asepna ah agualzawhna te a mu ArchBishop in Baltimore ah Catholic numeino te ading sang khat a phuat na dingin Elizabeth kiangah huhna ngen hi. Tua sang amakaih dingin Elizabeth in 1809 kumin Charity nungak siangtho congregation phuankhia hi.
Elizabeth in 1821 kum, June (4) ni-in Emmitsburg ah si hi. Amah in a sih ma diakin lai khat gelh hi. Tua in,
“Akual khat leh khat a ki tuah a siangtho sikkhau”
-Topa Jesu in pumpi khat bek nei hi. Amah lutang hi aa, eite in ama pumpi sunga khut leh khe te I hi hi.
-Khat bek ahi Kha in Khasiangtho hangin eite sungah mun hong la hi.
-Ama sunga om Vantung nopsakna leh nuntak tawntungna in eite ii khat bek ahi I lamet ahi hi.
-Ama kammal leh Pawlpi sungah eite in upna khat bek I nei hi.
-Khat bek ahi, tuisawpna leh thupha hong luangna ahi, ama Sacramentu te sungah eite I ki hel khawm hi.
-Eite ii I it Pasian in Pasian khat bek ahi hi.
-Amah in ama ta te ahi, eite ii Pa ahi hi.
-Amah in na khempeuh ah, na khempeuh hangin, na khempeuh te tungah a om hi.
-Khat bek, khat bek, khat bek ahi, tua itna hangin huaihamna te khempeuh ki susia in, ki that hi. Tua itna kua in hamkhia zo ding hiam?
-Tua a ki hencip ki thutuakna, kilemna leh itna te pan kua suakta zo ding ahi hiam? Ka Kha aw, tua sikkual te tawh hong hencip in. Sihna hong pail eh sik bangin khauhin. Asiangtho Pasian kammal ii hong ciamna bangin hell gam kisia ding hi.
Misiangtho Elizabeth Ann Seton aw…Ko te adingin thu hong ngetsak tan.