Homily by Rev. Fr. Raphael Khuppi. (12.11.2022)

Christu sungah kong it ute naute, tuni i sim Lungdamna Laisiangtho sungah Topa Jesu in a thupi mahmah thu nam nih hong hilh hi. (Luke 18: 1-8)
A khatna ah, thu i nget ciangin lungduai taka i nget ding hong hilh hi. Lungduaina tawh kisai hong hilhna ah, meigongnu leh amanlo thukhenpa thugentehna zangin thu hong hilh hi. Amanlo thukhenpa pen mihingte zahtak ding cih genloh, Pasian na ngawn a zahtak lo pa, tu hun bang hi leh mite tung pan golhsum ngah ding bek a lam en, golh sum a ngah kei leh ama nasep ahi thukhen nasep nangawn a sem lo pa ahi hi. Tua bang mikhat in meigongnu’ thu pen almawh hetlo ding cih pen theih sa hi. Tua pen Meigongnu in zong thei hi.
Ahi zongin meigongnu lungkia lo, nungkik peuhmah lo hi. Amanlo thukhenpa kiangah khat vei bek hilo, nih vei thum vei pai kik teitei hi, lungkia vetlo hi. A tawpna ah amanlo thukhenpa zong a lungsim hong kikhel ta hi. Hih meigongnu’ thu khen sak kei leng hong nawngkai sak den ding hi, cih thei ahih manin a tawpna ah a thu khensak hi.
Mate gelh lungdamna Laisiangtho sungah, ngen un na ngah ding uh hi. Zong un, na mu ding uh hi. Kiu un kong hong kihon ding hi, ci hi. Pasian in a ngah hun ding gen lo bek a, ngah loh ding thu genlo hi. Tua a hih manin ngah mateng nget ding, muh mateng zon ding, kong hong kihon mateng kiuh ding ahi hi.
A thumanlo thukhenpa nangawn in huh a sawm hetloh meigongnu in huhna a nget thithe ciangin huh kha veve hi. Pasian pen a ciil Pasian hilo a, a cingh Pasian ahih manin i ngetna te hong pia lo-in omlo ding hi. Ahi zongin hong piak hun ding pen amah bekin thei hi. Ei lam pan i deih i kisapte i nget tanghtangh ding ei tavuan ahi hi.
A nihna ah, Upna thu i kip den ding Topa Jesu in hong hilh hi. Mihing Tapa hong paikik ciangin leitungah upna nei mi a mu diam? ci hi. Hih pen ei khat ciat i kidot ding hipah hi. Tu laitak Topa hong pai kik hi zenzen leh kei upna nei mi-in hong mu diam? Topa Jesu pen lung himawh mahmah hi. Upna i cih pen a kiam thei, a khang thei leh a mangthang thei zong ahi hi. Tua ahih manin Topa a lung himawh ahi hi. Tua ahih manin ze-etna sungah na puk loh nading un thu ngen un ci-in hong vaikhak hi.
Ama hong pai kik ciang, upna nei mi hong mu kei leh, khasiat huai mahmah kha ding hi. Upna nei ingh cih bek tawh upna nei kitang zolo a, upna pen zuihna tawh a tonkhop kei leh Thei min hut tawh kibang dinga, apua lam limci mahmah napi-in a sung lam kine theilo ding hi.
Tua ahih manin Topa hong pai ciangin a pil nungak nga te mah bangin upna meivak tawh Topa a muak, i hih zawh na dingin lungkia lo, lungduai takin thu ngen tawntung ni. Pasian ii paktat mite i suahzawh nangin hanciam ciatni.