Misiangtho te Pawini. (2022)

MISIANGTHO I CIH KUA TE HIAM
Eph 2:19 “Tua ahih ciangin note minam dang leh mi khual te na hi nawn kei uh hi. Misiangtho te tawh minam khat, gammi khat na hi ta uh a, Pasian innkuanpih te zong na hi uh hi.”
A kua ma khempeuh in tui sawpna Sacramentu akici Topa Jesu ii sungah upna i neihna, i suah thakna leh amah Topa leh Honpa, gumpa a I san khit ciangin ama misiangtho te zong ki hi-in a innkuan pih te zong ihi ta hi. U te nau te Biakna ukpipa Pope John Paul II na leh Mother Teresa te pen leitung ah a dam lai tak mah un “Anungta lai Misiangtho” ki ci liang uh hi.
Tua ahih man in misiangtho I cih te pen Pasian mun khempeuh ah om hi, cih thu a tel te, a um te , a thei te na hi uh hi. Pasian pen i kim i pam ah om hi, i mai ah om hi, i nung ah om hi, ei mihing te tawh a tawn tung in I ki sai den hi, Pasian pen eite kiang, eite gei ah om den hi, cih pen misiangtho te in nakpitak in na tel mahmah uh hi. Misiangtho te in Pasian leh amau lungsim, lungtang pen ki gawm sak tawntung in na khempeuh leh mun khempeuh ah Pasian om tawntung hi, cih pen um in Pasian pen eite lungtang ah a om den kei leh Pasian ki theithei lo-in, zong ki tel zo lo ding hi, cih a thei tel te a hi uh hi.
Misiangtho te in mite mawh maisak thei in mite mawhna a mang ngilh thei te a hi uh hi. Tua ahih man in (I Jn 1:8) na sungah bang ki mu thei hiam cih leh, “Mawhna ka nei kei hi, i ki cih leh ei leh ei a ki khem I hi hi. Eite sung ah thuman thutak a om lo ahi hi”, na ci hi. Misiangtho te in Pasian mawh maisakna pen tel in angah mite na hi-in midangte mawhna zong a maisak thei te na hi uh hi. Pasian in mite mawhna amaisakna thu midang te kiangah gen sawn ding, hawm khiat ding pen tavuan anei te hi hang cih pen a thei te ahi uh hi.
Mawhmaisakna in kilemna, ki pum khat na, i kha nuntak na a khang toh theih na dingin hih te pen I tawt ding lampi te hi, cih a thei te a hi uh hi. Misiangtho te in a mau leh amau mawhnei Nu/Pa cih a ki thei te hi uh a, a ki cin loh na te uh, a thanem na te uh thei in hehpihna anei te leh maisakna a pia thei te a hi uh hi. Misiangtho te mawhmai sak na pen I Topa Pasian hong it na leh I mawhnate hong maisakna hong phawk hong thei tel sak kik te hi. Khat vei naupang khat in mawhna abawl laitak Topa te khat in mu in biak inn huang pua ah paikhia sak a, Abba Bessarion zong ding vat in” kei zong mawh nei pa ka hi hi, ci-in tua nau pang pa tawh ton khawm in a pua ah a pai khia uh hi.
Misiangtho i cih te in lungnop simnopna, nuntakna a nei te ahi uh hi. Misiangtho ten lungnop na nei te a hih na uh pen Pasian leh mihing te a it man uh a hi hi. ki-it na I cih in lungnop ki pakna, ki lemna I bulpi hi cih a tel thei te a hi uh hi.Misiangtho te in Siangtho pumpi sung ah a om Topa Jesu I hong itna a etteh na uh hang in lungnopna, kha nopsak na a nei te ahi uh hi.
Misiangtho I cih te in lungsim kisiat na, tha kiamna omlo mite ahi uh hi. Misiangtho te in hong tung ding nuntakna ah kha nopsakna lam en in leitung gen theih na te lungnuam sin nopna tawh pua zo in a thuak zo uh hi. Nau pang khat in lau-na, linna om het lo-in a pa angsung ah lungnuam tak in a om mah bang in Misiangtho te in Pasian tungah muan na nei-in a beel tawntung uh hi. Jeam-presse de caussade in “Bangbang gen theih hamsatna, I thuak hang in nang leh nang lungsim tha nem sak kei in” ci-in hong hilh hi.
Misiangtho i cih te in mihing khempeuh a zah tak thei mi, a pi muh thei mi a hi uh hi. Mi khempeuh pen Pasian tanu tapa, Pasian i lim leh meel, Pasian Khasiangtho biak innpi te ahih na thu thei in zahtak uh hi. Mi khempeuh pen Topa Jesu mahmah in, ama si tawh a tat khiat mite hi, cih thei in mihing te hihna pen manpha sa in a zah tak mite a hi uh hi. Mite kua mah guptuam paih tuam nei lo-in a ki bang in hopih uh hi, zong it kim uh hi. Mihing khempeuh pen Topa Jesu in a sapmah bang in misiangtho te in zong mi khempeuh sam in muak uh hi. Mi zawng, mi hau deidan nei lo-in hopih ciat uh hi. Rom 10:12, “Tua Topa mah mi te khempeuh ii Topa ahi hi,” na ci hi.
Misiangtho i cih te in a lungsim uh a thaksuaksak den te a hi uh hi. Misiangtho te in it na leh kisikkik na tak tawh amau nuntakna pen a thak suak sak den te ahi uh hi. Amau nun takna ah muhdahna pan itna, hoih loh na pan hoih na, hoihna pan ahoih pen dong ah ki puahpha in a ki khel to to mite na hi uh hi. (Genteh na St. Augustine, St. Peter, St. Paul). Misiangtho i cih te in Pasian tung ah a ki-ap den mite na hi uh hi. Misiangtho i cih te in Pasian hehpihna tawh atawntung in nungta in ze-etna athuak nate, a hamsatna te uh thuak zo in ki dal zo uh hi. Pasian hehpihna sungah I om tak ciang in eite a mau te in hong huh hi.
Misiangtho icih te in (bang hun)2 ah ahi zong in a upna uh tawh Pasian a muanna thu pen a theitel mite ahi uh hi. Hatsat hun, lungnop hun te ah Pasian om hi cih thu pen um in tel uh hi. Misiangtho te in hih leitungah anuntak laitakun amau thanemna, ki tangsapna te ki tel in Pasian vangliatna te um in a beel mite ahi uh hi. Pasian huhna om lo-in, mi hing te in lamet bei, a huh ding omlo te hi, cih zong a tel te a hi uh hi.
Misiangtho i cih te in, thungetna ah nuamsa uh a hih man in Pasian mi tuam te hong hi uh hi.Pasian vangliatna pen atawntung in muangin um uh hi. “Pasian in sep theih loh nei lo hi (Lk 1:37) cih pen tel mahmah uh hi. Misiangtho te in thungetna sungah a nuam sate a hih mah bang in amau nuntakna sungah na lam dang, a lungdam huai, thu te tawh ki dim uh hi. Amau te in leitung khua vak, leitung ci hong hih na uh tawh hih leitung pen hong thak suak ding in a bawl te na hi uh hi. (Gentehna St. John Mary Viany, St. Francis Asisi.)
Misiangtho I cih te in Siangtho pumpi it-in azah tak, a bia den mite na hi uh hi. Amau te in Siangtho pumpi a biak na uh tawh kha tha, pumpi tha hat na leh hehnepna tuamtuam a ngah thei te a hi uh hi.
St. Mary Madaline Tipet si in siangtho pumpi kiangah ni khat in 30 vei bang va hawh in a bia misiangtho a hi hi. Hangery gam a, St. Elizabeth in zong a neu tung pan ki pan in Siangtho pumpi kiangah hawh in a bia den misiangtho mah na hi a, Siangtho pumpi bia ding in biak inn ah a pai tak ciangin biak inn bang na ki kalh leh biak inn tawh leh a baang pi pen zah tak in a nap khit ciangin ciah thei zel hi.
St. Francis Damia zong ni khat a na sep khempeuh a zawh ciangin Siangtho pumpi mai ah nitak thunget na ngen in, a bei khin tha hat nate Siangtho pumpi kiang pan ngah kik thei zel hi.
Siampi Topa Thomas Sanchards a ki ci pa in zong Siangtho pumpi pen ni khat in 5 vei, nipi zawh ni 4 ni bang in 8 vei bang a bia in pai den hi. Amah in ze-etna tawh a ki tuah ciangin Siangtho pumpi sung ah a om Jesu aw, mawhnei mi kei hong huh in, hong hehpih ta in ci-in thungen in tua a tuah khak ze-etna te pen na zo zel hi. U te nau te aw.
Tua ahih man in Misiangtho icih te kua te hiam cih thu I theih mah bang in misiangtho i cih te pen midang te hi lo-in nang zong, kei zong a hi thei lua i hi hi. Nuntakna siangtho tawh Pasian muang in, um in nungta peuh le hang misiangtho I hi thei takpi hi.
St. Paul in note in misiangtho te tawh gam mi khat, nam khat na hi uh a, Pasian inn kuan pih te zong na hi uh hi, ci hi. Tua ahih man in Pasian inn kuan, ama misiangtho ahi pai suak ding in Topan thupha hong pia ta hen.Amen.