Misiangtho John Eudes

Misiangtho John Eudes in Piantit gam, Normandy ah suak hi. Kum 14 aphak ciangin siangthona tawh nuntak nadingin kiciamna nei in Jesuit te kiangah pilna sin hi. Cardinal Berulle kiangpan paudan, thu gen dan cih te sin hi. Kum 24 aphak ciangin Siampi suak a, mission nasepna ah amakum tawh ki tuakin gualzawg ngah hi. Aman kum (20) sung mission nasep 110 huh zo hi. Kaal 6 sung bang tentan pia den a, mitampi pawlpi sungah hong lut uh hi. Amah in mawhsutna ah Pa khat bangin panpih thei hi. Nih vei si dektakin a cina aa, tua in sih nuama sih nadingin ki gingkholhna hi ci hi.
1643 kumin ama Jesuit congregation pan pusuak in a dang congregation khat phuan a, Jesu leh Mary ci-in phuak hi. Tua kipawlna in Siampite siangtho nading leh mite adingin mission sem ding cih ngimna nei hi. Siampi sinna sangah Pasian in mihingte tungah bangzahin hehpihna nei cih hilh cian aa, tua thu hangin amah hong minthang hi.
A kisikkik numeite adingin Sisters of Our Lady of Refuge cih kipawlna khat phuan aa, asawt ciangin tua kipawlna pen Good Shepherd Nuns ci-in kisam hi. Tua hun sungin misiangtho John pen thugenna leh mawhsut ngaihna te tawmvei ki khawl sak hi. Tua ahih manin aman tua hun sungin lai gelhin laibu bawl hi. Adiakdiak in Topa Jesu lungtang siangtho leh mawh cilna nei lo Tonu lungtang siangtho zahtakna thu te gelh hi. John Eudes in 1680 kum, August 19 ni ama kum 78 aphak in si hi. Amah pen Mission nasemte ahuh Misiangtho khat in kiciamteh hi.
Misiangtho John Eudes aw…ko te adingin thu hong ngetsak tan.