Misiangtho Dominic

1170 kum in, Spain gam, Calaroga ah suak hi. Siampi a suah khit ciangin Osma khua, Cathedal ah om in, tua lai ah St. Augustine thukhun te zui hi. 1204 kum in Denmark apai lai tak, Taulouse khua Hotel nei mihau khat tawh zan khat sung Pasian thu kikumin tua mihaupa in Pasian thu umin a san zawh nadingin gen pih zo hi.
 Tua pan Dominic in Pasian thu gen na pen ama talent ahih lam mu hi. Tua zawh ciangin Piantit gam, Albigenses ah sawlna ngah in, tua ah kum tawmvei sungin ama thugen siamna hang leh asiangtho ama nuntakna hangin mi tampi Pawlpi sungah lut uh hi. Dominic in Pasian thu um lo te tawh ki do na ah athanem zateih te kiangah “tem tangin thungetna tawh no leh no na ki dal un, puan hoih tangin ki niamkhiatna silh un” ci-in gen hi.
 Khat vei ama Pasian thu gen hoih na bang laibu pan na sin hiam ci-in ki donga, amah in “it na laibu cih loh adang laibu pan hi kei” ci-in dawng hi. A man alawm tawm khat te tawh the Order of Preachers congregation phuan a, 1216 kum in ki kip sak hi. Dominic in a lawm te Pasian thu ahih kei leh Pasian bek tawh a ki ho nading uh leh “lungsim deihnate kikep zawhna in leitung uk zawhna hi. Tua lungsim deihnate ih zawh ding kisam hi. Tua hi kei leh tua lungsim deihgawhnate in ei hong uk ding hi” ci-in gen hi.
 Amah pen Tonu Maria pahtawina in khi khinna a zang masa pen hi. 1217 kum, Tonu Maria vantungah a ki lak tohna pawini in Dominican nungzui te mun tuamtuam ah paisak in “ei te’ khaici kemcing lo in ih vawh ding hi” ci-in vaikha hi. Kum 52 aphak hun,1221 kumin Bologna ah si hi.
Misiangtho Dominic aw…ko te adingin thu hong ngetsak tan.