Homily by Rev. Fr. Mark Khai Dal. Aug 4. 2022

Mt 16: 13 - 23
Christu sungah kongit thuzui U Leh Nau te aw, Topa Jesu in a nungzuite khiangah “Note in kei, kua hi hong ci na hi uh hiam? Ci-in a dot leh Simon Peter in, “Nangmah in a nungta Pasian’ Tapa, Christu na hi hi”, ci -in ah a dawng kik hi. Topa Jesu pen “A nungta Pasian’ Tapa” cih thei aa, sang a hih man, “Simon Peter aw, Nang in thupha ngah mi na hi hi. Hih suangpi tungah ka pawlpi ka lam ding hi.” Ci-in ah Jesu in agen kik hi. Tua thuneihna khat pen Topa Jesu phuatsa, hell khua’ kongkhatte na ngawn a zoh ngeiloh ding Pawlpi tungah thuneih na tawh a uk ding Topa Jesu in Peter na pia aa na ap hi. A min Simon pan in minthak “Peter” min na pia a, Peter a khiatna in Suangpi (or) rock na ki-ci hi. Aramaic kam in gen leng Cephas kici in, Greek kam in gen leng Petros hi-a, Latin kam -in gen leng Petrus na ki ci hi.
Misiangtho Peter Topa Jesu in ateel ma-in Simon hi a, Topa Jesu’ teelna angah khit teh, Simon pan Peter hong suak hi. Tuisawpna sacramentu isaan ma-in, ih zomin bek kei nei aa, tuisawpna sacramentu sanga, Pasian’ tanu, tapa I suak kik teh, I zomin mai ah, Joseph, John, Cecilia, Lucy cih bang-in ah misiangtho min I kivawh na-in deih bang in a ki kai zeau zeau hi lo-in, Pasian’ tanu tapa tak tak suak ta cih na hi-a, Pasian’ vantunggam tun theihna lampi hong kihong ta ahi hi.
Khuamial tanu tapa pan in, Pasian’ tanu tapa a kisuak kik a hi hi. Topa Jesu ii nuntakna leh Pa Pasian’na a sepkhiatna, “Gupkhiatna” nasep pi pen Pasian’ tanu tapa ihih na tawh kizui-in I Catholic Christian nuntakna tawh I hawp kul hi. Misiangtho Paulu in Christian thu-um mi te khiang ah “Topa Jesu ii Lungtang leh lungsim ngaihsutna, I hihna ding” taai kawm in na hilh hi. Singlamteh kihel lo in Topa Jeus’ mission sepkhiatna apicing loh mang bangin, Topa Jesu’ singlamteh puak na ei Christian te-in I puakpih kei leh Christian khat I nuntakna leh Pasian’na I sepkhiatna te apicing zo lo hi
“Satan, ka nungah om in! kei aadingin khaktanna na suak hi. Bang hang hima cih leh, na ngaihsutnate in Pasian’ ngaihsutna hi lo a, mihingte’ ngaihsutna ahi hi.” Mt16:23 Pasian’ mi khat sungpan Satan pau thei dia? Paunak khat ah, “A tee sial sial khempeuh kham hi lo hi.” acih mah bangin, I ngaihsutnate Pasian khiangpan hongpai tawntung dan bangin I ngaihsut loh ding ii lungdamna laisiangtho in hong hilh hi. Topa Jesu aading in, Pasain’ khiang pan thu aza thei mi ahih nak leh makaih dinmun keem zo ding hi. Nungzui pi Peter’ nuntak na I etkik teh Jesu in ama’ nungzuipite khempeuh I Makai pi ding atel na pen a kum aham/amoi na tawh hilo, sanglai pilsiamna hang, Leitungbuppi tawh akizoptheih na man tawh hi tuan lo, Ama I Ham leh pau, beh leh phungpi tawh zong atel khia hi lo zaw-in Pasian in Peter tungah amuanhuai leh a kician mah mah thumaanna/ thudikna na kihil zawk man hi cih I theih kul hi.
Ahih hang in ah, Jesu in Peter pen makaipimun apiak khit asawt khit teh, Jesu pen Peter lam nunghei kik-in “Satan, ka nungah om in! kei aadingin khaktanna na suak hi. Bang hang hima cih leh, na ngaihsutnate in Pasian’ ngaihsutna hi lo a, mihingte’ ngaihsutna ahi hi.” Na ci leu leu mawk hi. Peter pen mihingkhat-in nagenteh nawn lo hi. Satan in Peter’kam zangin Topa Jesu I gimthuak ding leh sihna ding thu lungbuaisak mawk hi. Topa Jesu in khenteltheihna nei ahih man-in Satan in Peter’kam a zatlam a theisiam hi.
Kong it sanggam u leh nau te aw, eite khiang ah Pasian in hong hopih ding cih thu pen I daaltheihloh mah bangin, Satan in zong ei hong hopih ding cih thu zong I daal zawhlo hun om thei zel hi. Bang bang hi mah ta se leh, I theih ding in ah Pasian’ hong hopih na leh Satan’ hong hopihna pen a ki lamdan lam I theih kul/I tel kul hi. Tua theihna in ah Khasiangtho Pasian in hong itman aa hong piakkhong Letsong hi. Tua theihna mah tawh Pasian in ama Pasian hihna thu Peter khiang ah na ki theihsak mah bangin Satan in Peter tungtawn in kampau hi cih pen zong Jesu in na thei khin hi. Topa Jesu in Makaaipi dinga, a teel khiat ngiat Peter na ngawn gaal antah na ah tuntheina, natna pan kipelh zawhloh na na om thei hi.
Tua haksat nate I kantan zawhna ding in tawhpi khat kisam hi. Tua tawhpi-in “Thungetna” tawhpi a hi hi. “Thungetna in Pasian tawh ki ho na hi a, Pasian tawh hong ki naisak hi.” Tu ni I zak Late laisiangtho in zong, “Pasian aw, ka sungah asiangtho lungtang hong piang sak in.” ci in I sim hi. Pasian aw kei tung ah “Khenteel theihna” thupha hong neisak in ci-in zong thu I ngen lai ding hi.

*** Topa Pasian in na omna ciat uh ah note tawh hong om khawm tawntung in, thupha hong pia tawntung ta hen.