Misiangtho Alphonsa

July 28 ni pen, India gam ii a masa pen numei Misiangtho ahi, Misiangtho Alphonsa ii pawini hi. Amah pen a Nu’n a paai zawh kha (8) ciangin suak aa, unau (5) sung pan a neu pen hi-in amah a suahzawh kha (3) khit ciangin a Nu in sih san hi. Alphonsa in Nu leh Pa itna zong ngah kha lo hi. A Nu a sih khit ciangin a Pa in zi kik nei hi.

A taktak in Alphonsa ii min pen Alphonsa hi lo-in Annakutty hi aa, Little Anna ci-in ki sam hi. A Nu a sih khit ciangin amah a Pi tawh om hi. A Pi pen Pasian thu a han ciam mahmah leh midangte a huh thei mahmah khat ahi hi. Ahi zongin Primary sang aman khit ciangin a Pi kiang pan a nu kik kiangah ki om sak kik hi.

A nu kik in ta thum nei hi. A nu kik pen a lungduai vetlo khat zong ahi hi. Nikhat a Nu kik ta te in a Nu’ pai sak lohna mun ah pai in Haigah tampi tawh hong ciah uh aa, inn a tun uh ciangin Annakutty zong pia uh hi. Tua laitak, a Nu kik in Annakutty ci-in sam ahih manin a Nu kik ta te in hai a lawhna thu uh a gen loh nangin Annakutty gen uh hi. A nu kik in awng kawmin a Annakutty a sap kawmin inn tungah hong kahto aa, bang hih na hi uh hiam ci-in a dot leh a ta thum te in a khut uh a nung lam ah koih in a Nu kiang uh ah Nu nong pai sak lohna te ah pai lo ka hi uh maw, na thu hong mang ung ci-in dawng uh hi. A Nu in na dan uh man kei, na khut uh bang hangin na nung lam uh ah koih na hi uh hiam ci-in a dot lai tak, a khut sung pan upmawh lohpi in a hai tawi hong kia suk hi. Tua ciangin a Nu in hai lo na hi uh hiam a cih leh a ta thum te in lo kei ung ci-in dawng kik uh a hih manin a Nu kik Annakutty lamah ki hei in bang hangin hong gen lo-in om na hi hiam? Amaute hai lo in a pai uh ahi hiam ci-in a dot ciangin naupang thum te in kongkhak vang pan in en in Annakutty in a gen loh nading in a lu uh pei san uh ahih manin Annakutty pau lo-in om hi. A nu kik heh semsem in Annakutty tawng gawp ahih manin a ta thum te in Annakutty hehpihhuai sa uh aa, amah tawh bang mah kisai kei. Ko ut thu tawh a pai hi ung a cih uh ciangin a Nu kik in Annakutty thum kik hi.

Annakutty in a neu tung pankipan a lungduai mahmah khat ahi hi. Ahi zongin kum (13) aphak ciangin a nu kik in pasal neihsak ding sawm hi. Annakutty in pasal nei nuam lo ahihna leh nungak siangtho a suah nopna a gen ciangin a nu kik in maikha ciangin zuthawl hong pia ding hi, amah pen mi hoih khat hi-in a innkuan uh zong a nei mawh lo hi, nang ading kong ngaihsut sakna hi ci-in gen hi. Tua ciangin Annakutty a Pa mai ah pai in kap kawmin a nu kik kiangah a gen sak na ding a thum hangin a Pa in a zi thu nial ngamlo ahih manin a tanu huh zo lo hi. Annakutty in St. Theresa a it mahmah khat hi a, nitak khat thu anget lai tak, St. Theresa ama kiangah ki langh hi. Tua ciangin ama nungak siangtho suahnopna khang semsem hi.

Annakutty in ka mel sia gawp leh kuamah in hong tenpih nuam nawnlo ding hi ci-in ngaihsun a, a ki ten ding ni uh zingsang in Singlamteh ciaptehna bawl in meiphual pi sung sik suk hi. Tua bang in a hihna tawh mopawi vai bei in amah zato kipuak aa, a nu kik zong ki sikkik in Annakutty thum kik hi. Zato pan a tuak ciangin a Pa leh a nukik in St. Franciscan nungak siangtho sangah ap pah uh hi. Tua sang pan nungak siangtho a suah ciangin Alphonsa cih min la aa, tua pan Sr. Alphonsa ci-in mi tampi in thei uh hi. Nungak siangtho a suah khit ciangin ama vaipuak pen naupang te lai hilhna hi aa naupang te in zong amah it thei mahmah uh hi.

Nikhat, ama khan sungah thungen in a om laitak, guta khat tem tawi in a kahtoh a muh ciangin Alphonsa lau in awng aa, guta pa in awng ken a cih hangin Alphonsa sibup in tuk suk hi. Amah pen a neu tung pankipan awm sung natna anei khat ahi hi. Adam loh sung nangawnin midangte ading thu ngetsak zo lai hi. Amah pen natna namkim anei khat zong ahi hi. Tua bangin natna tuamtuam aneih hangin amah cik mah hunin thumin tau ngei lo hi. Bang hang hiam cih leh ama natna te in Singlamteh tungah Topa Jesu thuakna tawh teh leh bang mah hi lo hi ci hi. Tua bang natna tuamtuam tawh kum (36) a phak hunin si hi. Amah a sih khit ciangin amah a kivuina han ah naupang te in mei vak sak zel in paak koih sak zel uh hi.

Khat vei, naupang khat a khe bai ahih manin siavuan kiang a lah uh hangin dam zo lo hi. Tua ciangin Sr. Alphonsa’ han ah pai-in thu a nget uh leh tua naupang khe dam kikin hoih takin lam pai kik thei hi ci-in teci apang thuzui innkuan khat om hi. Misiangtho Alphonsa pen damlohna, vun tawh kisai meima, natna te leh khe ah natna khat peuhpeuh a om ciangin hong huh Misiangtho hi. Misiangtho Alphonsa aw…Ko te adingin thu hong ngetsak tan.