Misiangtho Joachim leh Anna te pawini (July 26.2022)

Jesu’ Pi, St. Anna taangthu
Misiangtho Anna thu pen Laisiangtho thak sungah kitam muh khol lo hi. Anuntak sung taangthu leh a pasal Joachim thu zong A.D 200 hun pawl a Jacob laibu “Protoevangelium” cih laibu pan in kimu thei bek hi. Tua laibu sungah Anna pen a teek mahmah dongin ta a neih nai loh thu ki mu thei hi. Kum tampitak Ta neih theih na ding anget pen a ngah loh hangin a lung khiat lohna thu, a tawntung in thu a nget teitei na thu kimu thei hi.
Nikhat ni ciangin Galilee ah a inn gei uh ah a om Laurel sing a kici nuai ah thungen a aom laitakin, a kiangah Vantung mi hong ki lang a, “Anna aw, na thungetna pen Topa in hong za hi; gaai in ta na nei ding a, tua nata pen leitung khempeuh ah a min a thang ding hi” a ci hi. Anna in, “Ka Topa Pasian thu mah bangin Ta, Pasal ahih kei leh Numei ka neih naak leh Ka Topa Pasian kiangah ka-ap kik ding a, a nuntak sungin siangtho takin Topa na a sem ding hi” ci-in a dawng kik hi.
Hih thu ih et ciangin mailam thu ding genna a hih lam kimu hi. Anna in a tanu in Pasian tapa ading na a sep dan ding pen a thei khol a hi kei hi. Amah zong lei leh van Topa Pi’ a hih lam ding zong a thei khol a hi tuan kei hi.
St. Anna in ama siangtho na hang in a lamdang hehpihna a ngah hi. Amin zong Hebrew kam pan a hong pai “Grace” (Hehpihna tawh a kidim nu) cih bulphuh a, a ki phuak min ahi hi. Anna in a thu ngahna pen limtak in a ciamteh den hi. A phawk tawntung hi. Maria a ki ci tanu hoih mahmah hong nei uh a, a pasal Joachim leh Anna in a tanu neih sun ii nusiat ding pen khasiat huai mah mah ta leh Maria pen kum (4) hong phak ciangin, Temple ah a koih uh hi. Amah in Temple pan in sangkah in Pasian thu a sin hi. Pasian nasepna ah a kiheel pah hi. Tua ahih manin Judah mite khempeuh in amau minam lakah mikhat in Temple Siampite lak pan Pasian na sem aneih uh pen a ki phatsakpih mahmah uh hi. Tua in Pahtawina lian mahmah khat ahi hi.
(Leitungah lim gelh siam masa penpen ahi, Leonardo da Vinci in lai thei lo mite theih theih dingin, Maria Nu leh Pa lim leh Maria leh Jesu limte pen ih muh ciangin bang ci mi hi a, bang zah takin it huai cih te hong tel sak thei pah hi. Anna leh Joachim, Jesu leh Maria pen ih muh teh Jesu kiangah ih pai na ding a kongkhakpi a hih lam uh zong hong phawk sak hi.)
Laibu khat "The Mystic City" akici laibu sungah, Agreda Maria in, "St. Anna in a nuntak sung hun tam zaw pen Thungetna leh Amanpha nasepna in a zatkhit ciangin, Atanu Maria pen kum (13) a phak lai takin a ang ah tawi kawmin a si hi," na ci hi.
Lim suai siam tampi takin St.Anna a sih dinga a laitah hun laitak pen maitai in, etlawm takin a na suai uh hi. St. Anna Pahtawina leh Ama kiangah thungetna pen Kum 1300 hun pawl akipan hong minthang in, hong ki zeel pan pan hi. Amah a phawk tawn tung na dingun, Piantit gam Dovi munah Biakinnpi a lam uh hi. Kum 1382 kum ciangin, Mangkang gam kehmpeuh ah hong thang semsem in Pahtawina lian mahmah a bawl uh hi. Tua a hih manin Ama pawi ni dingin, Pawlpi in July 26 ni hong kipsak hi. Tua mah bangin tulaitak Pawlpi in zong hih July 26 ni pen Tonu Maria' Nu le Pa Pawi a hih mah bangin, Nu leh Pa Pawi ci-in leitung khempeuh ah thuzuite zat dingin hong kip sak uh hi.
Tuhun laitakin, St.Anna min tawh a kilam Biakinn minthang mah mah nih om hi. St.Anne ci-in, Aurace khua Piantit gam leh St.Anne de Beaupre Quebec, a kici Canada gamah a om hi. St.Anna ii guh sagih te pen Apt akici Biakinnpi pan a la uh a tua te lakah a ban guh pen ngun leh kham tawh a tuam uh hi. A zung buh (28) te zong misiangtho te van koihna munah ngun leh kham kuang sungah hoih tak in a koih uh hi.
Canada gam St.Anne Biakinn pen Beaupre khua a om a mihing 5,000 val om na ahi hi.Tua biakinn ah tulaitak in, St.Anne kiangah thungen a hong pai pen kum khat in mi 3, 000, 000 val bangin tua khuapi ah hong pai uh hi. Beaupre khua ih cih pen Laurentian mual gei St.Lawrence lui tawh ki gamla lo hi.
Khatvei, Breton Tembaw galkap te pen St. Lawrence gun sungah apai laitakin, huih nakpitakin hong nung a, lauhuai mahmah zah dongin hong om hi. Tua tembaw leh atung a tuang te in a lau mah mah uh hi. Hong lau huai seemseem ciangin, St.Anna kiangah thu a ngen uh hi. Tua bang a, thu a ngetkhit uh ciangin, tembaw pen luigei ah thakhat thu in bangmah kisia hetlo in hong kilawnkhia hi. Tembaw a tuang mi khempeuh in lamdang a sa mahmah uh hi. Tua bang a lauhuaina pan suahtaakna a neihna hangun Topa Pasian kiang leh St.Anna tungah Lungdamkohna Biakinnpi lam ding bang in a kithei uh hi. Tua lui tawh a ki nai na mun ah Biakinnpi a lam uh a,tua Biakinn a lam laitak un, asem te lak ah khat Lovis Guimond a kici a khe a zaw mikhat in zon g a seem hi. Ahihangin deih bang in a seem zo kei hi. Asep theih bang bang in, aseem tei tei a, asep theih pen in, asual ah suangpeek a phah hi. Suangpeek a thumna a phah khit ma in, asuangpeek thumna pen hong liing gawp bangin a thei hi. Tua lai takin amah zong upmawh lohpi-in, dingin lam a pai leh anatna pen damin, hoih takin lam pai in lungdamna thu a thang sak hi.
Tua bang a, Tembaw naseem khat cidam taka a omna thu pen Canada gam khempeuh ah meikuang bangin aki zeel pah hi. Tua ahih manin, Misante (Red Indians) nangawn in cina te hong paipih in, mi tampi takin damna a ngah uh hi. St.Anna ii minthanna pen acina damsak te in teci pangin, a thang seem seem hi. Hih St.Anna pen Pawlpi in, "Naupang mibang a a pianglo te' Tonu" ci-in minthanna tuam khat a pia hi. Tua mah bangin, mibanglo naupang tampi tak pen anu apa ngetsakna te St. Anna in hong ngai in, tu dong mahin, a um mite hong huh tawntung hi. Naupang lam pai theiphalo te pen Beaupre munah St.Anne Biak inn ah, hong pai in, huhna a ngente in cidam na leh tha thak ngah in a thahat kik uh hi. Tua ahih manin, tua Biak innpi gei ah zato innpi khat a lam uh hi.
St. Anna taangthu bu sungah a ki at na ih et ciangin, a it mahmah a tanu Maria pen Temple ah ciingtakin a apna pen ih etteh theih dingin a hong theih sak na ahih mah bangin, ih tuu ih tate pen Pasian naseem dingin ih ap zawh nang hong phawk sak hi. St. Anna pen a tupa Topa Jesu amuh khitteh a leitung nuntaakna bei pan hi ding hi ci-in ki um mawh hi.