Misiangtho Margaret of Antioch

Margaret pen a nu in amah a suahzawh a sawt lo-in sih san ahih manin a Pa in nurse khat kiangah Margaret ap hi. Margaret ii a Pa pen Pasian thu umlo khat hi aa, ahi zongin amah a apna nurse pen Pasian thu a hanciam mahmah khat ahi hi.

Khat vei, amau pata kam ki nial aa, a Pa in a tanu pen ni (7) sung an leh tui pia lo-in a lupna khan sungah kalh cip hi. Ni (7) a cin ciangin a Pa in a tanu a sap kik hangin Margaret Christian na suak khin ahih manin a pa tawh ki sel leuleu uh aa, Margaret a inn pan pai khia in amah a kem nurse kiangah om in nurse ii sila khat bangin a tuu te cingin om hi. Amah a mel hoih mahmah ahih manin tangval te in en sim zel uh hi.

Nikhat, kumpipa in Margaret tuu cingin a om laitak mukha aa, amuh phet in ngai pah hi. Ahi zongin Margaret in nial ahih manin kumpipa in amah man sak hi. A matna ahangin kumpipa a tenpih loh hang hi lo-in, amah Christian khat ahih man ahi hi. Ama upna a nusiat ding a gen uh hangin Margaret in nial hi. Tua bangin a nial na hangin amah thong sungah khum uh hi.

Tua thong sungah Gulpi lawmvalh sak uh aa, ahi zongin Margaret in Singlamteh khat pua ahih manin thungen in om hi. Tua gulpi in a valh hangin amah in a thunget khawl tuan lo-in ngen suak aa, a sawt lo ciangin ama tawi singlamteh tung pan vang khat hong taang khia aa, gulpi gil sung pan amah hong pusuak hi. Tua ciangin kumpipa in Margaret pen mei phual pi tungah diing sak leuleu hi. Ahi zongin Margaret bang mah ci tuan lo hi.

Tua bangin bang mah a cih tuan loh ciangin mipi muhna, mipi mai ah thah ding a hanciam leu leu uh hi. Ahi zongin tua amau han ciamna amawkna suak veve hi. Kumpipa heh lua mahmah ahih manin tuisa so sungah koih sak leu leu hi. Tua bangin a tuamtuam in Margaret that ding a hanciam hangun tangtung tuan lo hi. Anunung ciangin a ngawngtan in a that uh ciangin si pan hi. Misiangtho Margaret pen naupaai te a huh Misiangtho in ki ciamteh hi.
Misiangtho Margaret aw…Ko te adingin thu hong ngetsaktan.