Misiangtho Maria Goretti Pawini (6 July 2022)

Kum 12 a pha a meel hoih mahmah, Italy nungakno Maria in a innkuanpihte’ lokhawhna ah a huh hi. Amah, sang a kah khak loh hangin Pasian’ thu ahih leh hoihtakin a sin kha hi. Ni khat ni-in kum 19 a pha ahi a vengpa Alessandro a kici lokho mi khangno khat in Maria te’ inn gei lampi ah a pai laitak thakhat thu-in a inn sung uh ah lutvatin Maria zawhthawh thu-in buan dingin a hanciam hi. Maria na ut peuhmah lo-a, hi thei kei, hi thei peuhmah kei! Ci-in a awng hi. Hong sukha vet kei in, Alessandro aw! Mawhna lian hi! Nang Hell khuk sung na pai ding hi, a ci hi.

Maria a kipekgawp ciangin Alessandro in a tem dokin 14vei a dawt hi. Nasa lua-in Maria sualtung ah tuksuk-a, “Topa Pasian aw, ka si ta ding hi. Nu aw, ka si ta ding hi,” ci-in a awng hi. Tua ciangin Maria Goretti’ lupna inndei panin Alessandro a taikhia hi.

Maria, zato ah kupuak-a tua zato ah ni nih sung nasiatakin natna a thuak hi. Siampipa in Alessandro’ mawhna a maisak leh a maisak loh Maria’ kiangah a dot leh amah in, “Topa Jesu ka itna hangin ka maisak hi, keimah tawh a kibangin Alessandro zong vantung gamah ka omsak nuam hi, Pasian in a mawhna na maisak ta hen,” a ci hi.

Maria in a khut sungah Tonu Maria’ limneu khat tawi-in singlamteh nam kawmin a si hi. Hih thu 1902 kum-a thupiang ahi hi. Alessandro, kum 29 sung thongkia-a, thong sungah kikhelna ngahin thu-um mahmah khat hong suak hi.

Maria Goretti, Pope Pius XII in 1950 kum June kha ni 25 ni-in misiangtho suak hi, ci-in a tangko hi. Tua ni-in St. Peter biakinnpi ah a teek mahmah Maria Goretti’ nu zong va kihel thei hi. Khangnote a kihhuai gamtatna gamta loin a siangtho mahmah theihna dingun a cing a kem misiangtho-in amah kiciamteh hi.

Misiangtho Maria Goretti aw…Ko te adingin thu hong ngetsak tan.