Tui Phumpa John Suahni Pawi

Tonu Maria bangin St. John the Baptist zong vantung gam nopsakna angah ban ah leitung ah suahni pawipi bawl sak dingin alamdang in thupha angah khat ahi hi. A nulepa te in Pasian mai ah thuman citak ahih na tawh ki zui-in, Pasian maipha ngah in, anu Elizabeth in (acingh) ta nei thei lo leh teekta hi mah ta leh Pasian in thupha pia hi.

Khat vei a Pa Zechariah in Biak inn ah Pasian na asep lai tak, vantung mi Gabriel hong ki lang a, “Zechariah aw lau kei in, lungkham kei in, na thungetna Pasian in hong dawng hi. Na zi Elizabeth in ta pa khat anei ding hi,” a cih leh Zechariah in amau teek lua ta ahih manin um zo lo-in nui hi. Tua ciangin vantung mi-in kong gen thu um lo na hih manin ka thu gen a kicing dong in na pau thei kei ding hi ci hi.

Elizabeth asuah khit ni 8 a cin ni-in naumin phuak uh aa, aveng te leh a tanau te in amin ding in Zecharih mah hi ding hi acih uh leh Elizabeth in hi lo hi, ama min John ci-in phuak ding acih ciang, a lawm ten lamdang sa mahmah uh hi. A pa adot uh leh a pa in zong John hi ding ci-in lai gilh in gen hi. Tua lai tak in a kam hong ki hong a, Israel te Pasian tungah thupha om tawntung ta hen ci-in Pasian min phat hi. Naupang no in khangto in Kha Siangtho tawh ki dim a, Israel mi namte lak ah a ki lahkhiat mateng in sehnel gam ah om hi.