Misiangtho Aloysius Gonzaga

Misiangtho Aloysius in 1568 kum in Italy gam Gonzaga khua ah suak hi. A neu lai-in a nu leh a pa tawh Italy gam-a a Nu leh a Pa’ lamsa innpi ah teeng uh hi. A Pa pen Roman Empire ah galkap mangpi khat hi-a, a neu lai-in a pa tawh galkap sungah sauveipi om uh a hih manin a kilawm lo, a kihhuai kammalte a zang thei zel hi. Ahi zongin a nu in thuhilh den ahih manin Pasian simmawhna in bangzahtakin lauhuai hiam, cih thu a thei hi. A nu’ makaihna tawh Aloysius in thunget nuamsa-in kha thu leh Pasian’ thu a ngaihsun thei ta hi.

Aloysius, a nu leh a pate in Spain gam, Madrid khua-a mipil khat kiangah zum nasep dan a tuamtuamte leh pilna sin dingin paisak hi. Ama thu bulphuh in, ‘Keimah in a thupi nate’ aadingin a piang ka hi hi,’ cih ahi hi. Kum 20 a phak ciangin Gonzaga a, a nu leh a pa’ neihsa logamte leh a neih a lamh a gamhluahte letmatthuh-in nusia-a, Jesuit siampi kipawlna sangah siampi sin dingin lut hi.

A lawmte in mite a hehpihna leh huhna pia dingin kigingsa-a a omnate hangin Aloysius it mahmah uh a, a lungsim siangtho mahmah ahih manin amah a zahtak uh hi.

Rome ah Aloysius in mi cinate kem ahih manin a sawt lo ciangin natna a ngah hi. Tua natna hanga piang meima in amah nakpitakin gimsak mahmah hi. Tua natna hangin Aloysius, siampi a suak zo kei hi. A natna a noptuamna dingin singlamteh khat a et kawmin a nuntakna a bei hi.

Asihma in a Nu kiangah a laikhak nunung pen sungah “Pasian maipha mu in a bia khinta ahi, a sisa khat adingin khasia in kahna tawh Pasian itna leh hehpihna te na simmawh bawl khak loh na dingin kidawm in. Eite’ kikhen na in a tawntung ki khenna hi lo aa, vantung ah i ki mukik ding hi” ci-in gelh hi. A mah a sihin kum 23 bek pha pan-a, khangnote a cing a kem misiangtho-in kiciamteh hi.

Misiangtho Aloysius aw..kote adingin thu hong ngetsak tan.