Fatima Tonu pawini. (May 13.2022)

1917 kum, May 13 ni-in, Portugal gam, Fatima khua neu khat ah kum (10) apha, Lucia in a innlak naute nih ahi, kum (9) gual Francisco leh kum (7) gual Jacinta te tawh Cova a ki cihna munah tuu a cing lai tak un, Tehno singkung tungpan Tonu Maria amaute kiangah ki langh hi. Tonu Maria in a kang sitset puan leh atung pan Ngun mel puan tualpi pen a lu pan a khe dong silhin diing in a om a mu uh hi. A khut nih gawmin a taklam khut ah Khi thungetna a kang khat vial hi.
Tonu Maria in tua naupang thum te kiangah amah van tung pan hong pai ahihna gen hi. Tua ban ah kha sial ni (13) ni a tun sim in October kha dong tua munah a pai na dingun ki ciamsak hi. Ama ii a kilahna thu leh amaute bang hih sak nuam cih damin kong gen ding hi ci-in zong Tonu in ki ciamna pia hi. Tua ki ciamna te zong a vek in ki cing khin hi.
Tua munah tua naupangno te kiangah Tonu Maria a kilah ma in tua naupang thum te kiangah vantungmi khat ki langh ngei in naupang te thungetna tom khat zong hilh ngei hi. Tua thungetna in “Ka Pasian aw, nang kong um hi. Kong bia hi. Kong lamen hi. Kong it hi. Topa aw, nang hong um lo, hong bia lo, hong lamen lo, hong it lo mite tangin kong thum hi”. Hih thungetna thum vei a sim khit ciangin amaute kiang pan vantungmi mang kik pah hi.
Tonu Maria a ki lah ciangin Lucia in “ka sih ciangin vantung gam ka tung ding hiam” ci-in a dot ciangin Tonu in “hi mah hi. Na tung ding hi” ci hi. “Jacinta ee a pai kha dia” ci-in a dot leh “amah zong pai ding hi” ci-in dawng kik hi. “Francisco ee leh a pai kha dia” a cih leh Tonu in tawmvei sung bangmah gen lo-in thu khat peuh a ngaisun bangin a om khit ciangin “amah zong pai kha ding hi. Ahi zongin amah in Khi tampi a khin kul ding hi” ci-in dawng hi.
Tonu genna hangin Francisco in siangtho takin om denin, a hun ngah sim in khi khin den hi. Amah in ni khat in Khi gui 8-9 khin hi ki ci hi. Tua ban ah Tonu Maria in amaute kiangah khi (10) khin khit sim in a nget ding uh thungetna zong hilh hi. Tua thungetna amaute in ngen den uh aa, a nulehpa te uh zong hilh in ngen sak uh hi. Tua thungetna in “Ka Topa Jesu aw, ko te mawhna hong mai sak inla, mei kuangpi tawh hong ki pelh sak tan. Mi khempeuh vantunggam nuampi hong tung sak inla, nong hehpihna a ki sam mite a tuam mahmah in hong huh tan” ahi hi.
Tonu in amaute kiangah leitung mawh nei mite ading thu a ngetsak nading uh, ki dekna te a bawl sak nading uh gen in hell khuk sungah a kia mi bangzah in tam hiam cih a theih nading un naupang thum te hell lak hi. Naupang te lau mahmah uh aa, hell khuk sungah hi zahtak in mi a tamna hangin lamdang sa mahmah uh hi.
Tonu kilahna thu a nini in ki zel semsem aa, tua munah mi tampi ki kaikhawm uh hi. Sebtember (13) ni-in tua munah mi (30000) bang ki kaikhawm uh hi. Tua bangin mi tampi a kaihkhopna hangin buaina apiang ding kumpite lau uh a hih manin naupang thumte tua munah a pai nawnloh nangun khauh takin kham uh hi. Ahi zongin a mau khamna a mawkna suak ahih manin kham nawnlo in naupangte pai sak vet uh hi.
October (13) ni ahi, a nunung pen Tonu ki lahni in mipi (70000) kim bang ki kaikhawm hi. Tonu Maria in ama ki ciamna bangin tua ni-in na lamdang khat lak hi. Tua na lamdang in minunte (10) sung Ni ki kiimvelh hi. Tua thu piang a mu mite lau in kap uh aa, amaute in um in teci pang uh hi.
Tua ciangin Lucia in Tonu kiangah nang kua hi aa, bang hangin hong pai na hi hiam ci-in a dot ciangin Tonu in “Kei-in Khi thungetna kumpinu ka hi hi. Kei in thuzuite ki khel in a mawhna te hangin ki sikin Pasian kiangah mawhmaina a nget na ding uh a thei sak dingin hong pai ka hi hi. Gentheih haksatna, bawlsiatna a thuak ka tapa ii lungtang natna dingin a bawl nawnloh nang uh, Khi a khin na ding uh, a siangtho ka lungtang muangin amau leh amau ka lungtang sungah hong ki-ap na ding uh, kha sial amasa pen (Saturday) simin (5) vei ki zomin Siangtho Pumpi sang na tawh kei tawh a kibangin gim thuakna, ka tapa tawh a ki bangin gim thuakna te lungngai in mawhna dan lohna a bawl nangun a hi zongin, a gen dingin hong pai ka hi hi” ci hi.
Tua theihsakna thu te khempeuh pen Lucia in a kep suak na dingin vaikhak hi. Francisco in (1919) kum, April kha in si aa, Jacinta in (1920) kum, February kha in si hi. Amau nihte pen Tonu in vantunggam ah ka sam baih ding hi ci-in ki ciamna pia hi. Lucia ahih leh leitung ah tawm vei sung om suakin Tonu ii lungtang zahtak piakna ki zel sak hi. Lucia in Portugal gam, Carmelite nungak siangtho khat suak hi. 2005 kum, February 13 ni-in Lucia si hi.