Homily By Rev. Fr. Joseph Zo Mung (April 13.2022)

Mt 26: 14-25
Christu sungah kong it nulehpa, ulehnau te, tuni I sim Lungdamna Laisiangtho sungah Judah Iscariot in Topa Jesu a lehhekna thu I mu hi. Hi Laisiangtho pen Nipi Kaal Siangtho sungah kisim phadiak hi. Judah Iscariot in Siampi lian te, Pharisee te kiangah va pai-in dangka san sawmthum tawh Topa Jesu na-ap hi. Hih thu Topa Jesu in thei khin ahih manin note sung pan khat in kei hong lehhak ding hi. Tua mi a Nu sungpan piang kei leh hoih zaw lai ding hi ci hi.
Judah in Topa Jesu a sih ding a deih manin a zuak hilo in sum bawlna in a zang nuam bek hi ci-in Laisiangtho siam te in gen uh hi. Judah pen sum kem hi aa, sum met bawl siam mahmah hi. Tua ahih manin Siampi lian te in dangka san sawmthum hong pia nung a cih pankipan Judah in Topa Jesu bang ci lehhek ding cih hun hoih na zong pah hi ci-in hi Laisiangtho sungah I mu thei hi. Tua ahih manin Judah in Topa Jesu a lehhekna pen sum met a deih luat man ahi hi. Tua ahih manin Misiangtho Pual in “Sum in siatna, mawhna khempeuh ii ki patna hi” na ci hi. Sum pen hoih mahmah hi, ahi zongin zang siam kei leng siatna zong hong tun thei ahih lam Misiangtho Paul hun laipek in na gen hi. Tu hun tu laitakin zong sum hangin buaina tampi tak piang hi.
Tua ahih manin a val lua in I deih ciang sum in siatna lam ah hong tun thei aa, I nuntakna ah Pasian nangawn tawh hong kikhen sak thei hi. Judah in sum hangin a siapa a lehhek mah bangin eite in zong tua sum deih luatna hangin ankuang khat peuh tawh I Pasian I khek kha thei hi. I upna, I biakna zong sum bawmno khat tawh I nusia thei hi. I cihtakna, I thumanna te zong sum tawmno khat tawh khek in I cihtakna ki nusia thei hi.
Tua ahih manin mawhna I bawl sialsial in Judah in Topa Jesu a zuak mah bangin eite in zong Topa Jesu a zuak I hi aa, Topa Jesu zong a that te I hi hi. Tua ahih manin eite in tawm vei sung leitung nuntakna ah tawntung nopsakna I ngah na dingin i upna te zungthuk khah in, a picing upna nei-in thuman thutak tawh I nuntak ding kisam hi.
Tuni in Judah in a Topa a zuak pen manlo hi cih thei na pi-in sum a deih luat manin na zuak veve hi. Eite sung zongah pawlkhat in manlo hi cih a theih hangin a manlo lamah teci na pang kha, thukhen mang te in zong amanlo thei na pi-in sum tam a pia zo zaw te aman loh hangin na panpih thei kha ding hi. Tua hun hong tung thei ding hi.
Tua ahih manin kei koi dinmun ah om ka hiam cih kisit tel in tawmvei sung leitung nuntakna ading bek ngaihsun lo-in, a tawntung kha nuntakna I ngah na dingin thumanna leh cihtakna tawh na I sep zawh nangin hanciam ni. Tua banga I hih zawh na dingin I biak Topa Pasian in ei mimal khat kim ciat thupha hong pia ta hen.