Homily By Rev. Fr. Joseph Zo Mung (April 12.2022)

Jn 13: 21-33, 36-38
Christu sungah kong it ulehnau te, tuni Lungdamna Laisiangtho sungah Topa Jesu in eite bangzah takin hong it hiam, bangzahtak in eitung ah lungduai hiam cih thu tel takin I mu hi.
Topa Jesu in a lunggim mahmah ta ahih manin a nungzuipi te tungah bang na ci hiam cih leh “Ken aman takpi kong cih in ah note lak ah khat in kei hong lehhek ding hi” ci-in hangsan takin na gen hi. Anungzui te in kua ding hiam ci-in na ki dong uh hi. Ahih hangin Topa Jesu in amah a lehhek ding pa kua hiam cih thei khin hi. Ahi zongin bang mah cih lo hi. Tua bek thamlo in Judah Iscariot kiangah zong nasep ding te a manlang in sem in ci-in phal takin sem sak hi.
Pasian in khuavak ahih manin eite khua vak sungah I gamtat ding hong deih hi. Ahi zongin khua vak sungah I gamtat loh ciangin khua zing sungah I gamta kha zel hi. Tuni in Topa Jesu in Judah Iscariot zong a kikhel nop leh kikhel nading a hun pia lai hi. Ahi zongin amah kikhel lo hi.
Tua banah Topa Jesu in Peter kiangah Ak khuangma in kei thum vei nong nial ding hi ci-in ei mihingte cihtak lohna, I thanemna te tel takin hong thei hi. Ahi zongin mawhna sungah I om ding hong deihlo hi. Hong deihlo himahta leh hong khaktan tuan lo hi. Tuni in eite in Pasian hong itna I tel hi. Asia apha bawl theihna te zong Pasian in kicing takin hong pia hi. Tua te khua zing sungah zang ding maw, khua vak sungah zang ding maw cih pen ei teel ding hi aa, I teelna tawh kituak in a thuak dingte I hi hi.
Eite sungah khat veivei ciangin thungen leng ze-etna tam ci-in thungen lo a om zong I om kha thei hi. Topa Jesu in ze-et na a thuak ding alau manin nahoih sep ding na khawl tuanlo aa, bang zah takin ze-et na, buaina om ta leh nahoih a sepna khawl tuanlo in, a tawntung in ka Pa deihna bang a sem dingin hong pai ka hi hi ci-in sem suak hi. Hih Laisiangtho in eite tha hong pia mahmah hi.
Tua ahih manin Topa Jesu I ettehna in nahoih I sep den ding, haksatna, nawngkaaina hong khaktan ding, hong langpang ding tampi om hi cih thei mah taleng tua te tungah lungkia lo-in, nasep hoih, Pasian deihna I sep suak ding, thu I nget ding, biakpiakna I piak ding a kisapna thu hi Laisiangtho in hong thei sak hi.
Tuni in Judah leh Peter te bangin ahoih I sep nading leh a hoihlo I sep na ding pilna, damna te hong pia aa, tua te khua zing sungah zang ding maw, khua vak sungah zang ding, mite siat na dingin na sem ding maw, mite hoih na dingin na sem ding, Pasian deihna tawh kituakin na sem ding maw, dawimangpa deihna bangin na sem ding cihte eite in I teel theih na dingin Pasian in I mai ah hong koih hi.
Tua ahih manin tuni Pasian in hong it manin suahtakna hong pia aa, tua I suahtakna, I pilna, I siamna, I hanta, I hauhna te I zat siam zawh nangin han ciam ni. Ahoih lam aa I zat theih leh ei ahampha hi aa, a sia lam aa I zat leh ei a hamsia hi ding hi. Tua ahih manin Pasian hong piak thupha te, Pasian hong itna te amawkna in zang lo-in khua vak sungah I zat zawh ciat nangin han ciam ni. Tua banga I hih zawh nang I biak Topa Pasian in ei mimal kim ciat thupha hong pia ta hen.