Homily By Rev. Fr. David Lian (April 11, 2022)

Jn 12: 1-11
Christu sungah kong it nulehpa, ulehnau te, tuni I pawlpi in Vuahun sungah kidekna te, ki sikkikna te, Pasian hong itna te phawk kik in Pasian kiang zuan dingin tha hong pia hi.
Eite in Vuahun sungah a thupi pen ahi, nipi kaal siangtho sungah I lut ta hi. A diakdiakin Topa Jesu hong thawhkik ding hun anai kuan ahi tu hunah hoih takin kiging aa, Pasian hong itna te phawk aa, Pasian tungah I ki-ap zawh semsem nangin hanciam ni.
Lungdamna Laisiangtho en lehang, Topa Jesu in Martha, Mary leh Lazarus te inn ah a hawhna thu I mu hi. Topa Jesu amau inn ah ahawh ciangin Martha te in Topa Jesu it in hoih takin zin na do uh hi. Martha ahih leh Topa Jesu leh nungzuipi te nek dingin ama septheih zah tawh na sem hi. Lazarus ahih leh Topa Jesu tawh Sabuai ah tu khawmin ki holim hi. Mary ahih leh amawh akhialhna te kisikin Topa Jesu khe Sathau namtui nuhin a sam tawh nulsak hi. Hi laiah en lehang hih unau thum te in Topa Jesu bangzah takin it hiam? Amau hih theihna ciat tawh Topa Jesu itna na lakin na nasep sak uh hi.
Tua ahih manin eite khempeuh zong hih Vuahun sungin Topa Jesu itna phawk aa, ei dinmun, ei siamna tawh Topa Jesu I itna te lak ni. Topa Jesu adingin nungta ni. Topa Jesu zin do siam ni. Tua hi leh Topa Jesu eite kiangah ong hawh ding, eite kiangah nuamsa ding, eite in zong ama thu ngai ding hanga, tua hi leh Topa Jesu I itna te mite muh theih dingin lak zo semsem ding hi hang.
Tua ahih manin eite in nipi kaal siangtho sung I lut ta aa, thawhkik pawi hun nai ta I hi manin mawhna pan kisikin, gamtat hoih gamtatpha, lungsimhoih lungsim siangtho tawh Topa Jesu a it semsem, I kiim I paam aom haksatna tuamtuam a tuak mite it semsem in Topa Jesu hong pai na, hong hawhna te pen unau thum te bangin itna tawh zin do siam te I hih zawh nangin hanciam ni. I itna mite tungah a lak zo semsem I hih zawh nangin han ciamni.