Singhiang Siangtho Pawini. Catholic Nisim Lungdamna Laisiangtho. (April 10.2022)

Lk 22:14-23:56
14. A hun a tun ciangin Jesu le nungzuipite sabuai ah a tu khawm uh hi.

15. Jesu in amaute’ kiangah, “Gimna ka thuak ma-in hih Paisan pawi note tawh nek khop ding ka ut mahmah hi;

16. bang hang hiam cih leh ken kong genin ah, Pasian’ gam sungah deihna a kicin’ matengin, hih Paisan Pawi an ka ne nawn kei ding hi, a ci hi.

17. Tua ciangin Jesu in hai khat la a, lungdam a koh khit ciangin, “Hih hai la unla note’ lakah na hawm un;

18. bang hang hiam cih leh, ken kong genin ah, tu-a kipan Pasian’ gam hong tun matengin leenggahzu ka dawn nawn kei ding hi,” a ci hi.

19. Tua khit ciangin amah in khomun la a, lungdam a koh khit ciangin, khomun(b) balnenin a nungzuipite pia a, a gen inah, “Hih in note’ aading a kipia ka pumpi ahi hi. Kei nong phawkna dingun hih bangin na bawl un,” a ci hi.

20. Tua mah bangin nitak an a nek khit uh ciangin hai la a, a genin ah, “Hih hai in note’ aadinga a kibuakhia thuciam thak ka si ahi hi.

21. Ahi zongin kei hong lehhek dingpa’ khut in hih sabuai ah kei tawh a om khawm hi.

22. Bang hang hiam cih leh mihing’ Tapa in a kisehkhol mah bangin a pai ding hi. Ahi zongin amah a lehhekpa in gimna a thuak ding hi,” a ci hi.

23. Tua ciangin amaute in, “Tua banga gamta ding eite’ lakah kua ahi hiam?” ci-in khat le khat a kidong uh hi.

Liatna thu Kiselna

24. Nungzuipite’ lakah kua lian pen ahi hiam, ci-in kiselna khat a om hi.

25. Ahi zongin Jesu in amaute’ kiangah, “Gentile mite’ kumpite in a mite’ tungah kiliansakin uk uh a, thuneihna tawh amau a ukte mi hehpihte a kici uh hi.

26. Ahi zongin note na hih uh leh tua bang na hi kei ding uh hi. Note’ lakah a lian pen in a neu pen bang hi dinga, makaipa in nasem bang hi ding hi.

27. Bang hang hiam cih leh kua lianzaw ahi hiam? Sabuai-a a tupa ahi hiam, ahih kei leh a nasempa ahi hiam? Sabuai-a a tupa lianzaw hilo ahi hiam? Ahi zongin keimah in note’ lakah nasem khat bang ka hi hi.

28. Note in ze-etna ka thuak hun lai-in hong thuakpihte na hi uh hi.

29. Ka Pa in kei tungah gam hong ap mah bangin note’ tungah zong kong ap hi.

30. Tua hi-a note in keima gam sunga ka sabuai-ah an ne-in tui na dawn ding uh hi. Note in thukhenna tokhom tung ah tu-in, Israel minam sawm le nihte’ tungah thu na khen ding uh hi,” a ci hi.

Jesu in Peter’ Nialna ding Genkhol

31. “Simon, Simon aw, en in! Satan in buh haih bangin note khempeuh hong haih sawm hi.

32. Ahi zongin na upna a kiam lohna dingin nang aading thu kong ngetsak zo hi. Na kikhel kik khit ciangin na sanggamte na thahatsak in,” a ci hi.

33. Tua ciangin Peter in, “Topa aw, keimah in nang tawh thong kia khawm dingin ahi zongin, a si khawm dingin ahi zongin a kigingsa-in ka om hi,” a ci hi.

34. Jesu in, “Peter aw, ken kong genin ah, ‘Amah ka thei kei hi,’ ci-in thumvei nong nial khit matengin tuni-in ak khuanglo ding hi,” a ci hi.

Sumbawm, Thung-ip le Namsau

35. Jesu in amaute’ kiangah, “Sumbawm, thung-ip, khedapte keng loin note kong sawlkhiat lai-in, na kisapna uh a om hiam?” ci-in a dong hi. Amaute in, “Sapna khat beek om lo hi,”a ci uh hi.

36. Jesu in, “Tu-in ahih leh, sumbawm a nei mi in keng ta hen. Tua mah bangin thung-ip a nei mi in zong keng ta hen. Namsau a nei lo mi in a puan zuak henla, namsau lei ta hen.

37. Bang hang hiam cih leh ken kong genin ah, ‘Amah mawhneite tawh a kisim khawm ding hi,’ ci-in Lai Siangtho sungah a kigelhna thu kei’ tungah hong tangtung ding hi. Keima thu a kigelhsate khempeuh hong tangtung ding hi ta hi,” a ci hi.

38. Amaute in, “Topa aw, en in, hih lai-ah namsau nih a om hi,’’ a ci uh hi. Amah in, “Pha zo hi,” a ci hi.

Jesu in Olive Mual tungah Thungen

39. Jesu a pai ngei bangin Olive mual tungah kahto-a, a nungzuipite in amah a zui uh hi.

40. Tua mun a tun ciangin amah in amaute’ kiangah, “Ze-etna sungah na kihel lohna dingun thu na ngen un,” a ci hi.

41. Amaute suanglot khat tan bang a khen khit ciangin amah khukdinin,

42. “Pa aw, na deihna bang ahih leh hih hai tawh kei hong kipelhsak in. Ahi zongin kei’ deihna bang hi loin nangma deihna bang hi ta hen,” ci-in thu a ngen hi.

43. Tua ciangin vantung panin vantung mi khat hong kilang a, Jesu tha a pia hi.

44.Amah lungkham gimna tawh kidim ahih manin, nakpi-in thu ngen a, a khua-ulte sisan taak bangin leilak ah a taakkhia hi.]x

45. A thungetna pan dingkhia a, a nungzuipite’ kiangah a pai kik ciangin amaute dah lua-in thazawmin a ihmut laitak uh a tuak hi.

46. Amah in amaute’ kiangah, “Note bang hangin ihmu na hi uh hiam? Tho unla, ze-etna sungah na kihel lohna dingun thu na ngen un,” a ci hi.

Jesu a Kilehhekna le a Kimatna

47. Hih bangin Jesu in thu a nget laitakin thakhatin mihon khat hong pai a, nungzui sawm le nihte’ laka khat, Judas kici-pa in amaute hong makaih hi. Amah in Jesu nai-in a nam hi,

48. ahi zongin Jesu in ama kiangah, “Judas aw, nang in napna tawh Mihing’ Tapa lehhek ding na hi hiam?” a ci hi.

49. Jesu’ kimkot a om amaute in a piang ding thu a theih uh ciangin, “Topa aw, kote in namsau tawh ka sat ding uh hiam?” a ci uh hi.

50. Tua ciangin amaute’ lakah khat in siampi lianpa’ nasem khat a sat leh, a bil taklam a satkhia hi.

51. Ahi zongin Jesu in, “Hih bangin hih nawn kei in!” a cih khit ciangin amah in tua mipa’ bil lawngin a damsak hi.

52. Tua ciangin Jesu in amah man dinga hong pai siampi makaite, biakinn mangte le upate’ kiangah, “Note in galgukmat ding bangin kei hong man dingin namsau le molhtumte tawi-in hong kuan na hi uh hiam?

53. Keimah in ni simin biakinnpi sungah note’ lakah ka om laitakin nong man kei uh hi. Ahi zongin hih hun ahih leh note’ hun le khuamial’ thuneih hun ahi hi,” a ci hi.

54. Amaute in Jesu a mat khit uh ciangin, siampi lianpa’ inn ah a paipih uh hi. Peter in a gamla pan a zui hi.

55. Amaute in inntual laizang ah mei cihin a tutkhop laitakun, Peter zong amau lakah a tu hi.

56. Nasem numei khat in meitang ah amah mu a, tel-etin “Hih mipa zong Jesu tawh kipawl hi,” a ci hi.

57. Ahi zongin Peter in, “Numei aw, ken amah ka thei kei hi,” ci-in a nial hi.

58. Tua khit a sawt loin midang khat in amah mu a, “Nang zong tua mite’ lakah khat na hi hi,” a ci hi. Ahi zongin Peter in, “Mipa aw, ka hi peuhmah kei hi!” ci-in a dawng hi.

59. Tua khit nai khat bang ciangin midang khat in, “Hih mipa in Jesu tawh a kipawl takpi ahi hi. Bang hang hiam cih leh, amah in Galilee mi ahi hi,” a ci hi.

60. Ahi zongin Peter in, “Mipa aw, na thu gen ka thei peuhmah kei hi!” ci-in a dawng kik hi. Tua bangin a gen laitakin ak a khuang pah hi.

61. Topa kihei-in Peter a en hi. Tua ciangin Peter in, “Tuni-in ak a khuan’ ma-in, ‘Ka thei kei hi,’ ci-in nang in thumvei nong nial ding hi,” Topa in a cihna thu a phawk kik hi.

62. Tua ciangin amah pusuak a, nakpi-in a kap hi.

Jesu Kizahko-in Kisat

63. Tu-in Jesu a khihcip mite in amah zahko-in a sat uh hi.

64. Amaute in a maitang a tuam khit uh ciangin, “Nang kua in hong beng ahi hiam? Kamsangte bangin hong gen in,” a ci uh hi.

65. Amaute in simmawhna kam tampi tawh aamah a zahko uh hi.

Thu vaihawm Upate’ mai-ah Jesu

66. Khua a vak ciangin upate, siampi makaite le lai siangtho siamte kikhawm uh a, thu vaihawm upate kikhopna zumah Jesu a paipih uh hi.

67. Amaute in, “Nang Christuo na hih leh, kote hong gen in,” a ci uh hi. Jesu in, “Ken kong gen hangin note in nong um kei ding uh hi.

68. Ken kong dot hangin note in nong dawng kik kei ding uh hi.

69. Ahi zongin tu-a kipanin Mihing’ Tapa in Pasian’ vangliatna ziatlam ah a tu ding hi,” a ci hi.

70. Amaute khempeuh in, “Tua ahih leh, nang Pasian’ Tapa na hi hiam?” ci-in a dong uh hi. Jesu in amaute’ kiangah, “Na gen bangun ka hi hi,” a ci hi.

71. Tua ciangin amaute in, “Teci dang kul nawn ding ahi hiam? Eite in ama kam panin i za zo hi,” a ci uh hi.

1. Tua khit ciangin tua lai-a kikhawmte khempeuh ding uh a, Pilate’ kiangah amah a paipih uh hi.

2. Amaute in, “Hih pa in ka minam uh hong khem a, ‘Christu kici kumpi khat ka hi hi. Caesar kumpipa phiangsiah pia kei un,’ ci-in a gen kote in ka za uh hi,” ci-in Jesu a mawhsak uh hi.

3. Tua ciangin Pilate in ama kiangah, “Nang, Jew minamte’ Kumpi na hi hiam?” ci-in a dot leh, Jesu in, “Na cih mah bangin ka hi hi,” a ci hi.

4. Tua ciangin Pilate in siampi makaite le mihonpite’ kiangah, “Hih pa’ tungah mawhna bangmah ka mu kei hi,” a ci hi.

5. Ahi zongin amaute in, “Amah in a thuhilhna tawh Judea gam sunga mi khempeuh a toknawi hi. Galilee pan hong panin hih ciang dong hong tun hi,” a ci teitei uh hi.

Herod’ mai-ah Jesu

6. Pilate in hih thu a zak ciangin, “Hih mi Galilee gam mi ahi hiam?” ci-in a dong hi.

7. Pilate in Jesu pen Herod’ uk sung mi ahih lam a theih ciangin, Herod’ kiangah a puak hi. Tua hun laitakin Herod zong Jerusalem khuapi ah a om hi.

8. Herod in Jesu a muh ciangin a lungdam mahmah hi, bang hang hiam cih leh, amah in Jesu’ thu tampi za ngei ahih manin amah a muh nop zawh a sawt khin hi, amah in na lamdang pawlkhat a bawl dinga lamen hi.

9. Herod in thu tampi a dot hangin Jesu in a dawng kik kei hi.

10. Tua lai-ah siampi makaite le lai siangtho siamte ding uh a, nakpi-in a mawhsak uh hi.

11. Herod le a galkapte in Jesu simmawhin zahko uh a, puan hoih mahmah khat a silhsak khit uh ciangin, Pilate’ kiangah a puak kik uh hi.

12. Tua ni mahin Herod le Pilate a kilawmta kik uh hi; tua ma-in amaute gel a kigalneih uh ahi hi.

13. Tua ciangin Pilate in siampi makaite, upate le mipite kaikhawm a,

14. amaute’ kiangah, “Note in hih mipa pen mipite khemin mi a tawsawn khat hi, ci-in ka kiangah nong paipih uh hi. Note’ mai-ah amah ka dot hangin, na mawhsakna uh bangin mawhna khat beek ama tungah ka mu kei hi.

15. Herod in zong ama mawhna mu lo ahih manin ka kiangah amah hong puakkik ahi hi. A taktakin hih mipa in sihna thuakna zah dong dinga kilawm bangmah ahih kei hi.

16. Tua ahih manin amah ka satgawp khit ciangin ka khahkhia ding hi,” a ci hi.

17. Tua hun lai-in Paisan Pawi hun sungah thongkia mi khat khahkhiat theihna ding ngeina a om hi.

18. Tua ciangin mipite khempeuh in, “Hihpa that in! Barabbas hong khahkhia in!” ci-in aw khatin a kiko uh hi.

19. (Barabbas ahih leh khuapi sunga kumpi a langpanna le, mi a thahna hangin thong a kia ahi hi.)

20. Pilate in Jesu khahkhia nuam ahih manin amaute’ tungah a genkik hi.

21. Ahi zongin amaute in, “Hih pa singlamteh tungah that in! Singlamteh tungah that in!” ci-in a kiko uh hi.

22. Pilate in amaute’ kiangah, “Bang hang ahi hiam? Amah in mawhna bang ta khial ahi hiam? Ama sihna dingin a kilawm ama tungah thu khat beek ka mu kei hi. Tua ahih manin ka sat khit ciangin ka khahkhia ding hi,” ci-in a thumveina a gen hi.

23. Ahi zongin amaute in Jesu singlamteh tungah thahna ding nakpi takin kiko uh a,

24. amaute’ kikona aw in a zozaw hi; tua ahih manin Pilate in amau ngetna banga piak dingin a khensat hi.

25. Amah in langpanna hang le, mi a thahna hang a thong kia-pa amaute’ ngetna bangin khahkhia a, amau ut bangin a bawl dingun Jesu a piakhia hi.

26. Amaute in Jesu a paikhiatpih laitakun gam sung panin hong pai Cyrene khua mi Simon kici mi khat zawhthawh thu-in kai uh a, amah singlamteh suanin Jesu’ nung zui-in singlamteh a puasak uh hi.

27. Mipi tampi in amah zui uh a, tuate’ lakah amah kahin tamlawh-a a zui numei pawlkhat zong a kihel uh hi.

28. Jesu kihei-in amaute’ kiangah, “Jerusalem’ tanute aw, kei aadingin kap kei un. No aading le na tate uh aadingin na kapzaw un.

29. Bang hang hiam cih leh, ‘Tasel numei in thupha ngah ahi hi. Ta paai ngeilo gil le a kitep ngeilo nawite thupha ngah ahi uh hi,’ mite in a cih ding uh hun hong tung ta ding hi.

30. Tua ciangin amaute in, “Mualliante’ kiangah, ‘Ko tungah hong kicimsuk un!’ Mualneute’ kiangah, ‘Ko hong vukcipsuk un!” a ci ding uh hi.

31. Bang hang hiam cih leh, mite in sing hing tungah hih bangin bawl ahih leh, sing keu tungah bangci bawl ding uh ahi hiam?” a ci hi.

32. Amaute in misuam nih zong amah tawh thah khop dingin a paipih uh hi.

33. Amaute in ‘Lutang Guh’ kici mun a tun uh ciangin tua lai-ah Jesu le misuam nih a taklam ah khat, a veilam ah khat tawh singlamteh tungah a khai khawm uh hi.

34. Tua ciangin Jesu in, “Pa aw, amaute in bang hih cih thei lo uh ahih manin a mawhna uh na maisak in,” a ci hi. Amaute in lai aisaan-in a puante a hawm uh hi.

35. Mipite in dingin en uh a, ahi zongin amaute’ makaite in ahih leh, “Hih pa in midangte a honkhia thei hi. Amah, Pasian’ teelsa Christu ahih takpi leh, ama pumpi kihonkhia ta hen,” ci-in a zahko uh hi.

36. Galkapte zong ama kiangah hong pai uh a, a dawn dingin leenggahzu hau pia-in,

37. “Nang, Jew mite’ Kumpipa na hih takpi leh, nang le nang kihonkhia in,” ci-in a zahko uh hi.

38. “Hih pa in Jew mite’ Kumpipa ahi hi,”ci-in a ma lutungsan ah theihsakna lai zong a suang uh hi.

39. Tua lai-a kikhai misuamte khat in, “Nang, Christu hilo na hi hiam? Nang le nang kihonkhia inla ko zong hong honkhia in!”ci-in Jesu a zahko hi.

40. Ahi zongin adang khat pa in ahih leh, “Nangmahin hih pa mah bangin sih thukhenna thuak napi-in, Pasian kihta lo na hi hiam?

41. Eite gel ihih leh i mawh na thaman a thuak ihi hi. Bang hang hiam cih leh, eite gel in i gamtatna tawh kituak takin a thuak ihi hi, ahi zongin hih pa ahih leh, tatkhialhna khat beek nei lo hi,” ci-in tua pa a taai hi.

42. Tua khit ciangin amah in Jesu’ kiangah, “Topa aw, na gam sungah na lut ciangin kei hong phawk in,” a ci hi.

43. Jesu in, “Ken a man takpi kong genin ah, tuni-in Paradisu ah kei tawh na om khawm ding hi,” a ci hi.

Jesu’ Sihna
*44. Tua hun laitak pen sun sawm le nih pawl hi a, nitak nai thum dongin ni a tanna bei a, khuamialin leitung khempeuh khim a zing hi.

45. Biakinnpi puandal a laizang pan kikekin phel nih a suak hi.

46. Tua ciangin Jesu in, “Pa aw, ka kha nangma khut sungah kong ap hi,” ci-in nakpitakin a kiko khit ciangin a si hi.

47. Galkap za khat a uk mangpa in tua thu piangte a muh ciangin Pasian phat a, “Hih pa in mawh neilo, mi thuman taktak ahi hi,” a ci hi.

48. Hih thute en dinga hong pai mihonpi khempeuhte in, tua thu piangte a muh uh ciangin a awm uh bengin a ciah uuh hi.

49. Ahi zongin Jesu a thei mi khempeuhte le Galilee gam pan amah a zui numeite in gamlapi panin dingin hih thute a gal et uh hi.

50. Tua laitakin Judea gam Arimathea khua mi, Joseph kici mi khat a om hi. Amah pen mi hoih mi thuman upa vaihawm khat ahi hi.

51. Tua pa in upa dangte’ thukhensatnate le a gamtatnate uh thukimpihlo hi. Pasian’ gam lamenin a ngak gige mi khat ahi hi.

52. Tua pa Pilate’ kiangah va pai a, Jesu’ luang a ngen hi.

53. Amah in Jesu’ luang lakhiasukin saihadial puan tawh a tun khit ciangin, kuamah a kivui ngei nai lohna suangpi kikhuat han sungah a sial hi.

54. Tua ni pen Kigin ni hi a, Sabbath ni a kipan ding hi ta hi.

55. Galilee gam pan Jesu tawh hong paikhawm numeite in va zui uh a, a han le a luang bangci kikoih cih a mu uh hi.

56. Tua khit ciangin amaute ciah uh a, paknamtui le sathau namtui a kigingkhol uh hi. Sabbath ni-in amaute in Pasian’ thupiakna tawh kizui-in tawlnga-in a om uh hi.