Homily By Rev. Fr. Joseph Zo Mung (March 31.2022, Thur)

Jn 5: 31-47
Christu sungah kong it thuzui nulepa, ulenau te, tuni I sim Lungdamna Laisiangtho sungah Topa Jesu in a Pa adingin teci pang ahihna, ama adingin John in teci pang ahihna leh Moses thukhamte in ama hong pai nading teci apang ahihna thu te tel takin hong gen hi.
Ahi zongin Topa Jesu in kei in ka Pa adingin teci pang dingin hong pai ka hi hi cimah taseleh mite in Topa Jesu umlo uh hi. Judah mite in Topa Jesu umlo in Pasian ka um uh hi, Moses thukham te ka um uh hi ci napi’n Pasian deihna zui lo uh hi. Tua ahih manin tuni Topa Jesu in Pasian um in, Moses thu khamte um na hih uh leh bang hangin Pasian kiang pan hong pai kei hong umlo na hi uh hiam ci-in upna tawh kisai thu khauh takin gen hi.
Hi mite in Pasian um ung ci napi-in khat leh khat ki-itna om lo, a nuntakna ah ki khelna omlo, amau angsung ding bek ngaihsun, kipawlna adingin nasemlo in khat guak ading bekin nasem in Pasian deihna bangin gamta lo ahih manun Topa Jesu in khauh takin a gen ahi hi. Kei thu nong up kei uh leh Pasian a umlo na hi uh hi ci-in Topa Jesu in gen hi.
Tuni Lungdamna Laisiangtho in um maw, um lo cih namnih hong thei sak hi. Topa Jesu na up leh ama gen bangin zui, Pasian na up leh kei hong gen bangin zui ding, khat leh khat ki-it ding, deihsakna nei ding cih bangin hilh hi. Pasian deihna tawh kituak in itna tawh nungta in, Pasian tungah I upna te I gamtatna tawh a lakkhia zo te I hih nangin hanciam ni.
Tua ahih manin tuni Laisiangtho in Pasian a um takpi ka hi hiam, a um takpi ka hih leh ka zuih kul hi cih ngaihsun in Pasian I up takpi leh ama deihna I zuih zawh nangin han ciam ni. Tua banga I hih zawh nangin I biak Topa Pasian in mimal khat kim ciat thupha hong pia ta hen.