Homily By Rev. Fr. Joseph Zo Mung (March 30.2022, Wed)

Jn 5: 17-30
Christu sungah kong it ute naute, tuni Lungdamna Laisiangtho sungah Judah mite in Topa Jesu a san theihlohna, Topa Jesu thu a nialna uh I thei hi. Topa Jesu leh Judah mite kikal ah abuaina bulpi in bang hiam cih leh Judah mite in Pasian um na pi-in, Topa Jesu pen Pasian tapa hi cih um loin, Topa Jesu na sepna te in Pasian a langpang hi ci-in a nial uh ahi hi.
Tuni I sim Laisiangtho sungah Topa Jesu in ka Pa in tu dongin nasem hi. Tua mah bangin ken zong kasem hi ci hi. Tapa in ama thu tawh bang mah sep theih nei lo aa, Pa ii asawl bangin asem hi ci-in ama ii sepna khempeuh pen Pasian deihna bangin a sem ahihna thu hangsan takin gen hi. Tua ahih manin Judah mite in amah that nuam uh hi. Judah mite ii Pasian deihna azuihna leh Topa Jesu ii Pasian deihna azuih dan ki bangle ahih manin Judah mite in a that nuam ahi hi.
Topa Jesu in kei pen Pasian kiang pan hong pai hing. Kei ii Pasian deihna ka zuihna pen man zaw hi, no a manlo hi ci-in hangsan takin Judah mite na nial hi. Judah mite in Topa Jesu ii deihna zui loin Pasian kiangah direct in pai nuam ahih manin Topa Jesu in (Jn 12: 6) “Kei hong suang loin ka Pa kiangah kuamah tung thei lo ding hi” na ci hi.
(Mt 28: 18) na sungah “Vantung ahi aa, leitung ahi zongin thuneihna aana khempeuh kei tungah hong ki pia khin hi. Tua ahih manin note pai unla lungdamna thu tangko un” ci-in ama ii thuneihna anungzuite tungah aana pia in lungdamna thu tangko dingin na sawl hi. “Pa in kei hong sawl bangin ken zong note kong sawl hi” (Jn 20: 21) ah na gen lai hi. Tua ban ah (Mt 18: 18) sungah “Lei aa nahen te van ah ka hen dinga, lei aa na phel te van ah ka phel ding hi” ci-in Pasian in amah aana apiak mah bangin amah in zong anungzuipi te khauh takin aana na pia hi.
Tua ahih manin Topa Jesu deihna in nungzuipi te in Topa Jesu tungpan angah aana tavuan tawh lungdamna thu tangko ding. Tua ahih manin no hong sang te in kei hong sang hi a, no hong nial te in kei hong nial hi ci-in nungzuipi te tungah aana na pia hi.
Ahi zongin Judah mite in Topa Jesu umlo in Pasian a up mah bangun, tu laitakin zong Topa Jesu piak aana um lo aa, Topa Jesu a um Christian tampi I om kha hi. Sacramentu te, Pope, Siadawte, Siampi tung ah Topa Jesu in a piak aana um loin, Topa Jesu kiang direct in apai sawm mi tampi I om hi. Tua pen Topa Jesu ii deihna hilo hi. Topa Jesu in anungzuipi te tungtawn in ama kiang pai ding deih ahih manin nungzuipi te vasawl hi.
Tua ahih manin tuni I phawk dingin Topa Jesu in ama ii mawhmai sakna aana te, a thupha te pen lei ah nusia hi cih phawk ding hi hang. Lei ah na hen te van ah ka hen ding hi ci hi. Pasian itna thupha ahi, Sacramentu te a pia dingin lei ah Pawlpi khat hong phuan aa, tua pawlpi tungtawn in ama kiang pai ding deih ahih manin lei a na hen te van ah ka hen dinga, lei a naphelte van ah kaphel ding hi ci-in nungzuipi te tungah khauh takin aana na pia hi.
Pasian deihna, Topa Jesu deihna bang hiam cih tuni kantel ni. Judah mite bangin Topa Jesu loin Pasian kiang apia nop hang pai theilo hi. Tua mah bangin eiten zong lei ah aana nei ahi, Pawlpi, nungzuipi te thuneihna tungtawn in Topa Jesu sang loin, Sacramentu te sang loin, ama kiangah direct in I pai nop hangin Pasian deihna cih a tel lo I hi zaw ding hi. Judah mite in Pasian deihna zui a kisak mahmah uh hang, Topa Jesu deihna tawh na kibanglo hi. Laisiangtho te, nungzuipi te hong hilh bangin zui lo aa, ei deihna bangin I zuih leh Judah mite bangin lam I khial tawntung ding hi.
Tua ahih manin kong it thuzui ute naute, tuni in Topa Jesu a um bek hi loin, ama deihna banga, lampiman tawh ama kiang azuante I hih zawh nangin han ciam ni. Tua banga I hih zawh nang I biak Topa Pasian in mimal kim ciat thupha hong pia ta hen.