Homily By Rev. Fr. David Lian (March 28.2022, Mon)

Jn 4: 43-54
Christu sungah kong it ute naute, tuni Laisiangtho lungngai lehang, Pasian in leitung leh vantung thak bawlin abeisa hunte ki mangngil ding, hi bangin ka nasepna hangin note lungdam un. Nuam un. Jerusalem in nuamna, nopsakna in ka bawl dinga, mite in nuamsa ding hi ci-in Laisiangtho masa sungah I mu hi.
Pasian in ama mite ahi, Israel miten ama thumang lo-in, amah phawk lo-in a om ciang Pasian tawh ki gamla hi. Eite khempeuh zong tuisawpna Sacramentu I sanna hangin Israel minam thak, Pasian mite I hi a, Pasian bawl gam thak, gam hoih gam pha sungah om na ngah I hih manin Pasian tungah lungdam I kohna, Pasian nasepna lianpi te I phawk ding kisam hi.
Tuni Pasian in vantung leitung thak ka bawl ding hi, ka piangsak ding hi a cihna I lungngaih ciangin bang phawk I hiam cih leh Topa Jesu in sihna zo in vantungah a kahtoh ding ciangin a nungzuite kiangah note om na ding inn ka bawl ding hi. A om kei leh note kiangah kong pai kik dinga kong gen ding hi ci hi. Tua ahih manin Topa Jesu in eite om nading, amah tawh tawntung nopsakna ngah na dingin a paikhol ahihna te I mu hi.
Tua hi aa, Pasian gam in eite khat ciat ii lungtang sungah a om lam I phawk ding kisam hi. Pasian gamin eite tawh Pasian omkhopna ahih lam I phawk ding kisam hi. Pasian gamin Kha Siangtho tawh kidimna, Topa sungah nuntakna ahi hi cih zong I phawk ding kisam hi.
Eite khempeuh Israel minam thak, Pasian mi I hih manin Pasian gam, Pasian lungnopna, Pasian itna sungah a tawntung I om zawh nangin hanciam ni. Nungzuite in Kha Siangtho a sankhit uh ciangin upna, hangsanna tawh kidim in Pasian ading, Pasian gam ading hangsan takin na asep, a nuntak mah bang un eite zong Pasian gam, Pasian itna sungah I om leh thuman it in, thuman lunggulh in, thuman ading nasem in, mite ading nahoih napha asem ngam, a kipiakhia ngam te I hih zawh nading hanciam ding, thungen ding hi hang.
Tua ahih manin eite khat ciat sungah Pasian hong om leh, Pasian I om sak leh Pasian gam ah a om I hi aa, Pasian gam ah a om te bangin nuntakna hoih tawh I nuntak kim ciat na dingin zong hanciam ding hi hang.
Tuni Lungdamna Laisiangtho en lehang, Topa Jesu in Kumpi ulian khatpa ii tapa a damlo pen a damsakna thu I mu hi. Hih ulian pa in Topa Jesu kiangah pai-in, Topa aw, ka ta damlo hi, si dektak hi, hong pai-in ci-in huhna ngen hi. Topa Jesu in nangin nalamdang na muh kei leh a um ding hilo hi the ci hi. Ahi zongin hi ulianpa in hong pai-in, ka tapa a si ding hita hi a cih ciangin Topa Jesu in na tapa dam ding hi ci hi. Hi mipa in Topa Jesu gen ahih manin ama ciahna lampi ah a nasemte tawh kituakin a tapa adamna thu za hi. Hi laiah en lehang hi nasempa in Topa Jesu kiangah pai, Topa Jesu um, Topa Jesu beel ahih manin a tapa in damna ngah hi. Hih in Topa Jesu ii nalamdang abawl anihna hi ci-in Lungdamna Laisiangtho sungah I mu hi.
Ei Christian te khempeuh zong upna anei te I hih manin hi upna pen eite bekin kem ding hi lo-in, I upna mite tungah pulak aa, Topa Jesu a thei nailo, a um nailo te in a up nading un, nuntakna hoih, gamtatna pha tawh I upna te teci I pang zawh nang I han ciam ding ahi hi. Eite in ei mahmah ading ahi zongin, damna a kisam te ading ahi zongin, hi ulianpa mah bangin Topa Jesu kiangah thum ding, beel ding hi hang.
Adiak diak in I gamsungah, leitung ah gal tai mi, haksatna buaina a tuak mi tampi om hi. Tua te adingin Pasian kiangah pai-in thu ngetsakna, thupha bawlna, nahoih napha sepna te tawh mite tungah I upna te teci apangzo te I suah zawh na dingin hanciam ding hi hang. Hih ulian pa bangin haksatna I tuah ciang ahi zongin, midang ten haksatna atuah ciang ahi zongin mun dang ah pai masa lo-in Topa kiangah I pai masak ding ahi hi.
Eite nuntakna sungah I phawk khak, I phawk khak loh thupha tampi om ding hi. Tua te lungngai in Pasina I itna a khangsak zo, Pasian itna sungah nuntakna, mite tungah itna lahna tawh, gamtatna phatawh I upna te teci apang zo semsem te I hih zawh nangin hanciam ciatni.