Homily By Rev. Fr. John Mang (March 27.2022, Sun)

Lk 15: 1-3, 11-32
Zehtan hun sungah Nipi kaal (4) na I tung ta hi. Zehtanhun kipatin I tal tungah vut siangtho kinuhin “Mihing aw, phawkin, leivui pan nong pai aa, leivui ah na ciah kik ding hi” ci-in theih sakna tawh Zehtanhun a kipan I hi hi. I piangkhiatna leitang nikhat ni teh a zuan kik ding I hi hi. Zehtanhun sungin ki dekna te, thupha bawlna te a bawl dingin I Pawlpi in hong zawn ahi hi.
Tuni Laisiangtho te I lungngaih ciangin inn ciah, inn lam azuan, nang leh kei Pasian tanu tapa te I hih lam hong thei sak hi. Laisiangtho masa sungah Israel mite, Saltanna gam pan Pasian kamciamna Cannan gam tungin Pasian paik an leh tui te tawh lungdam a ko thei, inn azuan Israel minam tei, Pu Abraham tungtawn aa akamciam gam ahi, Cannan gam a tunpih kik Pasian ahih na Israel miten a phawk dingin tuni Laisiangtho sungah I sim aa, nang leh kei zong Eden huan pan a paikhia, Eden huan a zuan kik ding, Pasian tawh omkhopna vantunggam azuan kik dinga hong kisam, hong kizawn Pasian tanu tapa te I hih lam zong tuni Laisiangtho in hong phawksak nuam ahi hi.
Lungdamna Laisiangtho sungah tapa taimang tangthu I za hi. Tua in bang hong phawksak hiam cih leh Pasian in hehpihna khempeuh tawh a kicing, mawhna te hong maisak, Pa tawh akibang I Pa Pasian hi. Tapa taimangpa in apa inn sangin mundang anuamzaw ding sa in taikhia hi. Tua in bang tawh kibang hiam cih leh Eden huan sungah Pasian tawh omkhop nuam mahmah hi na pi’n, tua sanga anuam zaw dinga lametna anei Adam leh Eva te nuntakna hong phawksak kik hi.
Tapa taimangpa in gilkial daangtaak in a om ciang, ka Pa inn aa nasem te khamval annek tampi om ding hitah maw ci-in phawkkik in lungngai kik in, amawhna a khialhna te kisikkik in kei tho in ciah ning, ka pa kiangah thum ning, vantung leh nangmah tungah khial zo ing. Na ta cih dingin zong kilawm nawn keng, na nasem khat bangin hong bawl in cileng ka pa hong sang zo ding hi cih lametna tawh a pa kiang azuan kik tapa taimangpa ahi hi.
Ahi zongin ama lamet bang hilo in a Pa in a na galmuh ciangin dawnin nam hi. Puan hoih pen silhsak hi, khedap bulh sakin, zungbulh bualh sak hi. Gamh luahna ding pan paikhia in Salsuahna mun a zuan a tapa, sal suahna pan hong ciah kik ciangin inn luah za ahi, ta hihna tawh puan na silhsak kik hi. Tua in Adam leh Eva suan nang leh kei, ta cih dingin a kilawm nawnlo ta te nangawn, innluahza munah, gamh luah za mun ah I tunkik theih nading in Pasian in hong sam aa, ama gamh, ama inn, I piankhiatna inn I tun dong hong zawn, hong ngak den Pasian hi cih tuni Lungdamna Laisiangtho in hong thei sak hi.
Laisiangtho nihna sungah nungzuipi Paul in mi khat peuh Christu sungah a om leh mithak a suak hi ci hi. Nang leh kei Christian te zong tuisawpna Sacramentu I san ni pankipanin Christu puan bangin silhin thumanna, diktatna, cihtakna leh itna te sungah anungta dingin Pasian in a tanu a tapa te dingin hongsam hi. Tua ahih manin Misiangtho Paul in Pasian tawh a kilemna amanlang in bawl kik un. Pasian tawh a kilem dingin hong ciah kik un ci-in hong sam hi.
Tua ahih manin Israel mite in saltanna gam pan Pasian kamciamna gam, Canan gam a zuat kik mah bangin, tapa taimangpa in a Pa inn sang mundang nuamzaw ding hi cih lametna tawh taikhia in gentheih haksatna mawhna sal sungah a om ciang, a Pa itna, hehpihna te a phawk ciangin ciah kik in a Pa kiang azuat kik mah bangin, tuni nang leh kei zong Pa kiang zuan kik in mawhna saltangna nusia in, hoihlohna te nusia in, kimuhdahna, kithangpaihna, kihazatna, kigalneihna, kithahna te khempeuh vengin Pasian kamciam na gam, kilemna gam, ki-itna gam, Bawngnawi leh Khuaizu luangna gam, Pasian gam vantunggam I tun zawh na dingin thungen khawmni.