Homily By Rev. Fr. Raphael Khuppi (March 26.2022, Sat)

Lk 18: 9-14
Christu sungah kong it ute naute, tuni Lungdamna Laisiangtho sungah Topa Jesu in eite adingin a zuih huai, I nuntakpih dingin a hoih mahmah thu gentehna khat hong gen hi.
Hih thu gentehna ah minih thu ngen dingin biakinn sungah pai aa, tua minih te lakah khat ii thungetna pen ki sangin adang khat pa apen kisang lo hi ci hi. Tua minihte in kua te hiam cih leh khat pa in Pharisee ahi hi. Pharisee te pen thukham a ki zui sak mahmah, mi mawhna a zongzong te, amau leh amau man akisa mahmah te ahi uh hi. Amaute in apuatham nuntakna bek thupi sakin lungsim takpi palo cih Topa Jesu in thei ahih manin amaute tawh kam na kinial zel hi.
A dang khatpa pen siahdongte hi in, siahdongte pen mite in mawhnei mi ci-in a ciapteh te ahi hi. Siahdongte in mipite tungah adong te uh, Roma kumpite kiangah apiate hi-in mi tampi te in mawhnei mi in a ciapteh te uh ahi hi.
Tuni Topa Jesu thu gentehna ah Pharisee mipa biakinn sungah lut in thu anget ciangin ama ii hoihna teng pulak masa hi. Kei mah in siahdongpa bang ka hi kei hi, ni sagih sungah ninih an ka tang hi, ka ngah khempeuh sawmah khat ka pia hi ci-in amah leh amah ki sangkhai, kisial masa hi.
Ahi zongin siahdongpa hong pai-in biakinn sung alut limin amailam nangawn neh phei ngamlo in anung panin lukun sa in a awm bengin, vantunglam nangawn en ngamlo in, mawhneimi kei mah hong hehpih in ci-in kisikna tawh thungen hi. Tua minihte sungpan kua thungetna Pasian in za ahi hiam cih leh mawhnei mi in a kiciamteh mipa thungetna Pasian in za hi ci-in Topa Jesu in thu gentehna in hong gen hi.
Amah leh amah a kitawisang khempeuh in niamkhiatna thuak dinga, amah leh amah a kiniamkhiat te in tawi sangna, lapsangna ngah ding hi ci-in Topa Jesu in ki cian takin hong gen hi. Tua ahih manin ute naute Pasian in hun hoih ahi, zentan hun hong piak mah bangin eite in siahdongpa bangin mawh neimi I hihna ki thei in Pasian kiangah a zuan thei te I hih nangin han ciam ni.
Kiniamkhiatna tawh Pasian kiang a zuan, hehpihna angen te I suahzawh nangin tuni a thakin han ciam ding hi hang. Tua hi leh Topa in I thungetna te a siangtho in hong sangin, I thungetna te hong za in I kisapna te ah hong huh ding hi.